Duket se qëllimi i vetëm i linjës ajrore WizzAir është të shkaktojë pakënaqësi dhe të sjellë mungesë totale besueshmërie tek klientët e saj.
Live nga aeroporti “Nënë Tereza”, qytetarët na raportojnë se janë hasur me vonesa në çdo fluturim që WizzAir kishte në listën e tij.
Siç mund ta shihni në foton e raportuar tek QYTETARËT në Telegram (kliko këtu), fluturimet e WizzAir janë ato problematiket, që kanë gjithmonë shtyrje dhe asnjëherë lajmërime e komunikim të mëparshëm me pasagjerët.
Jo vetëm kaq, qytetarët raportojnë se vendet e tyre në avion janë shitur, duke u bërë ndryshime për të cilat pasagjerët s’janë në dijeni. Ky ndryshim i vendeve ka shkaktuar kaos për këdo që udhëton me WizzAir.
Madje, pasagjerët janë ende në mungesë informacioni për kohën e saktë që do t’u duhet të presin derisa të nisë fluturimi i tyre.
Në mungesë të plotë përgjegjshmërie nga Autoriteti Ndërkombëtar i Fluturimeve, Albcontrol, të cilit iu bllokuan llogaritë në Belgjikë me kërkesë të Francesco Becchettit dhe kredive me vlerë 5 miliardë lekë që qeveria i ka dhënë kompanisë nga paratë e taksapaguesve, ne kontaktuam me WizzAir. Mirëpo, përgjigjja që morëm ishte automatike, ndërsa askush nuk denjon t’i japë zgjidhje këtij problemi.
Për një panoramë më të plotë, rikujtojmë se qeveria shqiptare u detyrua të fusë dorën në xhepin e taksapaguesve për t’i dhënë hua kompanisë publike Albcontrol, pasi gjendja e saj financiare mbërriti në pikën e falimentit si rrjedhojë e bllokimit të dhjetëramiliona eurove të ardhura nga kërkesa e biznesmenit italian, Francesco Beccheti për pagesën e gjobës së dhënë nga gjykata e Arbitrazhit kundër qeverisë së kryeministrit Edi Rama.
Së fundmi, qeveria shqiptare ka vendosur të “prishë” Albcontrol dhe të krijojë një entitet të ri në vend të tij, që duket se lidhet me bllokimin e llogarive të Albcontrol në Belgjikë.
Manovra, e cila nuk shpjegon se si paratë e bllokuara gjatë viteve 2021, 2022 e 2023 dhe që arrijnë në dhjetëra milionë euro, do të mund të zhbllokohen dhe as nëse kredia prej 5 miliardë lekësh do të mund apo jo t’u kthehet taksapaguesve. Gjithsesi, projektligji, i publikuar së fundmi në faqen e Kuvendit të Shqipërisë, thotë se të ardhurat e agjencisë zëvendësuese të Albcontrol do të duhet të “përdoren ekskluzivisht për mbulimin e kostove”, një hile juridike që nënkupton se këto fonde do të jenë imune përkundrejt kërkesave për bllokim.
Projektligji është firmosur nga Belinda Balluku.
Si përfundim, qytetarët janë të zhgënjyer nga WizzAir, që është kritikuar në të kaluarën për vonesat e vazhdueshme, duke i lënë udhëtarët të ndihen të bllokuar dhe të pakënaqur. Vonesat e përsëritura jo vetëm që prishin planet e udhëtimit të pasagjerëve, por gjithashtu reflektojnë keq në reputacionin e linjës ajrore.
