Punonjësit e aeroportit të Barit raportojnë se çdo natë përsëritet e njëjta gjë me fluturimin e WizzAir për në Tiranë. Ata mbajnë barin e tyre të hapur vetëm nga keqardhja për pasagjerët e bllokuar.
Qytetarët raportojnë vonesat e përhershme dhe të stërzgjatura të linjës Bari-Tiranë me WizzAir. Herën e fundit, fluturimi u vonua për 12 orë – në vend që të nisej në orën 23:00, u nis të nesërmen në orën 11:00.
Shqiptarët të trajtuar ende si refugjatë, të shkelur me këmbë edhe në vitin 2024, u shtrinë dyshemeve të aeroportit e kafeneve që rrinë hapur çdo mbrëmje vetëm për ta, pasi check-in i bërë orë para nisjes nuk i lejon të largohen.
Një çift italian, që vinte për të vizituar Tiranën vetëm për një ditë, e pati të pamundur të kthehej mbrapsht pasi valixhet e tyre ishin nisur.
Pavarësisht denoncimeve të panumërta, s’ka asnjë reagim nga shteti, nga Autoriteti i Aviacionit Civil që jep licencat për fluturimet dhe është përgjegjës për kontrollin, nga Ministria e Turizmit apo një reflektim edhe nga vetë kompanitë përgjegjëse.
Heshtja e shtetit dhe mediave dukshëm tregon lidhjet e tyre me një dorë komanduese oligarku, që ka nën kontroll shtypin dhe institucionet tona.
WizzAir, kompania e skandaleve, duhet të sanksionohet urgjentisht për makthin që po u shkakton qytetarëve, ndërkohë që pas rasteve të përsëritura që duket se do të vazhdojnë gjithë verën, s’ka denjuar të bëjë ende asnjë deklaratë zyrtare.
Numri i kufizuar i avionëve, vonesat mbi 6-7 orë, mungesa e sqarimit dhe dëmshpërmblimit për pasagjerët dhe fshehja e këtij skandali nga mediat e blera të këtyre kompanive, e bëjnë WizzAir linjën ajrore që duhet të pezullohet një orë e më parë!
