Aktori i madh i skenës shqiptare, Lufta Paja ditën e djeshme në një intervistë për “Top Channel”, rrëfeu se nuk mund të merrte një ilaç për zemrën pasi ishte hequr nga skema e rimbursimit dhe çdo ditë e më shumë rrezikohej jeta e tij.
“Kur erdhi radha për të marrë trajtimin më tha mjekja që nuk e përfiton se ka disa procedura. Të më heqësh ksarelton mua është të më thuash të shkoj në trombozë, apo të shkoj në varreza të Tufinës apo Sharrës. Unë pensionit jam, nuk më del të blej 100 mijë lekë në muaj këtë ilaç. Do t’i bie në qafë fëmijëve. Mëshirë për ne. Shumë shumë edhe 5 vjet na ka ngarkesë kjo qeveri. Po jetuam dhe 5 vjetë kemi mirë”, u shpreh Luftar Paja.
Mirëpo pas kësaj deklarate nga ana e aktorit të njohur, mësohet se ai është kontaktuar nga ministrja e Shëndetësisë dhe Mirëqenies Sociale, Ogerta Manastirliu.
Pas bisedës me ministren, Luftar Paja ka dhënë një prononcim për “Dritare.net” dhe ka thënë se problemi i tij tashmë po zgjidhet.
“Problemi im po merr zgjidhje, më vjen shumë keq që çështja ime u politizua, nuk ishte ky qëllimi, megjithatë e rëndësishme është që tani gjithçka është në rregull. Dhe më e rëndësishme akoma, është që nuk flasim kot. Nuk na bie fjala në veshë që nuk dëgjojnë”, është shprehur aktori Luftar Paja.
