Një ditë pas gjobitjes me 20 milionë lekë për arsyen e pranisë së më shumë se dy personave në të njëjtën studio televizive, Inspektoriati Shtetëror Shëndetësor kërkon mbylljen e sinjalit të transmetimit të televizionit “Ora News”.
Bëhet e ditur se është urdhëruar menjëherë ndërprerja e aktivitetit dhe mbyllja e sinjalit të televizionit, pa bërë asnjë inspektim apo verifikim në terren.
Si rast përsëritjeje e kësaj shkeljeje, ISHSH dhe AMA kërkon mbylljen e sinjalit të këtij televizioni dhe ndalimit të funksionimit të pajisjeve, pas marrjes së vendimit nga ministria përgjegjëse për shëndetësinë dhe zbatohet nga organi kompetent, bazuar në nenin përkatës.
“Vijnë dy gjoba ISHSH nga 20 milion dhe një kërkesë për mbyllje aktiviteti. Nuk e di se me çfarë vullneti një kryeministri në këto merr vendimin për mbylljen e një televizioni. Kjo është demokracia që duam të bëjmë ne? Në shumë vend evropiane janë bërë emisione me shumë se 3 veta. Kur në një kohë që të ftuarit në studio kanë qenë më mbi 2 metra larg.
Duan të mbyllin televizionin sepse janë lejuar njerëzit të flasin në studio. Kjo është e qëllimshme. Është bërë inspektimi vetëm me foto, nuk kanë ardhur në televizion inspektorë. Nuk mund ti mbyllësh gojën se do të flasë. Nuk po mbyll biznesin por po mbyll fjalën e lirë. Kemi qenë të ndershëm përballë shikuesve dhe beteja do të vazhdojë”- është shprehur Brahim Shima.
Kujtojmë se që prej fillimit të izolimit, “Ora News” po përballet me vështirësi financiare, ndaj është detyruar të bëjë shkurtime në staf si dhe të ulë rrogat e gazetarëve.
Gjatë kësaj periudhe të vështirë, shteti jo vetëm që nuk i ka dhënë ndihmë, por edhe e ka gjobitur dhe tashmë kërkon ta mbyllë.
Qeveria vazhdon të përjashtojë nga paketa e ndihmës financiare mediat dhe gazetarët, në një kohë kur nevoja për informim është jetike dhe gazetarët vazhdojnë të qëndrojnë në krye të detyrës pa përkrahjen e shtetit.
