Ndonëse erdhi në detyrë pas dorëheqjes së Besa Shahinit, e cila në rolin e Ministres së Arsimit dështoi sidomos në këtë periudhë pandemie, (KLIKO) Evis Kushi duket se nuk do bëjë ndonjë gjë më shumë se paraardhësja e saj.
Jemi në fillim të vitit shkollor, i cili ka nisur me problematika të shumta, mësues të infektuar, mungesë infrastrukture, mosrespektim rregulloreje etj. (KLIKO) E në vend që të bënte diçka lidhur me gjendje kaotike në shkolla, ministrja e re e Arsimit ka firmosur edhe urdhërin sipas së cilit viti i ri akademik 2020-2021 do të fillojë më 2 nëntor.
Prej nisjes së vitit të ri shkollor media të ndryshme kanë raportuar raste të pafundme me nxënës apo mësues të infektuar, duke treguar më së miri se sa rrezik përbëjnë shkollat që janë hapur pa patur kushtet e nevojshme.
Skenarët
Nëse do të ketë rritje të numrit të të infektuarve në shkolla, Ministria e Arsimit pritet të zbatojë skenarin numër dy, që një pjesë e klasave të bëjnë mësim miks, duke u alternuar disa klasa mësim në shkolla disa online.
Ndërsa skenari më i keq është që mësimi online të shtrihet në të gjitha shkollat e vendit, por gjithmonë kjo do të jetë në varësi të situatës së të infektuarve në këto institucione por edhe në mbarë vendin, raporton Klan Plus.
Sipas Ministrisë së Arsimit, për t’i paraprirë çdo lloj situate, është ngritur platforma akademia.al, e cila do të ofrojë mësim të unifikuar. Ndërkohë që brenda javës që vjen mbyllet trajnimi i rreth 19 mijë mësuesve për mësim online.
Gjendja aktuale
Sipas të dhënave të deri tanishme, në mbarë vendin janë 130 mësues të të cilët janë të infektuar. Vatra më e nxehtë e ditëve të fundit ka qenë shkolla 9-vjeçare “Emin Duraku”, me 13 personel të infektuar, 10 mësues dhe 3 sanitare. Ndërsa numri i nxënësve në karantinë që prej fillimit të vitit shkollor është 60 në mbarë vendin.
Mësimi online dështoi
Studentët dhe nxënësit vijnë nga një semestër i dytë i dështuar, ku procesi mësimor online ka krijuar boshllëqe të mëdha. Ndonëse karantinimi si pasojë e shpërthimit të Covid-19 në muajin mars, kishte si zgjidhje për vijimin e procesit mësimor “mësimin online”, duket se ky i fundit ka shërbyer më shumë si një fasadë se të ketë kontribuar realisht për dije. (KLIKO)
Ata na kanë treguar në sondazhe dhe prononcime se mësimi online tregoi se ishte një dështim spektakolar, pasi nuk është realizuar me një plan të mirëmenduar. Shumë prej tyre nuk kanë mundur ta ndjekin, ashtu si shumë studentë të tjerë.
Në kushtet në të cilat është zhvilluar mësimi online ka qenë diskriminues dhe diferencues për ata studentë që nuk kanë pasur mjetet e nevojshme për t’a ndjekur. Madje studentët kanë pohuar se ishte një kosto shtesë bashkë me ofertat e internetit, wirless etj që duheshin paguar.
Kushtet në institucionet e arsimit
Rujtja e distancës dhe mbajtja e higjienës, janë dy kushtet bazë për të mos u rrezikuar nga infektimi me Covid-19. Disa drejtues shkollash në shtetet fiqnje si për shembull në Itali, kanë ngritur shqetësimin se në shumë institucione distanca nuk mund të ruhet, sepse nuk ka klasa mjaftueshëm dhe nuk janë siguruar banka një vëndëshe për nxënësit. Për këtë arsye ata kanë kërkuar shtyrjen e hapjes së shkollave deri sa gjithçka të jetë në rregull, ndërsa në vendin tonë duket se kjo gjë nuk i shqetëson aspak drejtuesit.
Zhvillimi ynë nuk mundet kurrsesi të krahasohet me atë të shteteve fqinje, ndaj nuk mund të mendojmë se ne i kemi marrë të gjitha masat për ruajtjen e distancës. Të gjithë e dimë se shkollat në vendin tonë kanë kaluar përtej kapaciteteve dhe për këtë arsye qeveria u detyrua të vendosë që orari mësimor të zhvillohet me 4 turne gjatë kësaj kohe. Për nxënësit që duhet të studiojnë gjatë turnit të fundit me siguri mësimdhënia nuk do të rezultojë aspak efektive, sepse kjo gjë është e vërtetuar edhe shkencërisht se rendimenti bie me kalimin e orëve.
Sakaq, shumica e shkollave në Shqipëri prej kohësh nuk sigurojnë as kushtet më minimale të higjienës, si mungesa e ujit të rrjedhshëm, sapunëve e detergjentëve të tjerë. Autoritetet nuk kanë dhënë asnjë detaj në lidhje me këtë gjë, duke u shprehur vetëm se shkollat që nuk sigurojnë kushtet nuk do të hapen. Sa do të ndodhë kjo gjë pritet ta shohim.
Përse ministrja nuk i jep maskat falas ashtu si fqinjët?
Paraardhësja e Kushit, Besa Shahini i dërgoi fëmijët në shkollë në mes të pandemisë e në mëshirë të virusit, por nuk ua siguroi vetë maskat fëmijëve, ashtu siç kanë bërë fqinjët, Italia dhe Greqia në prag të fillimit të vitit të ri shkollor.
Qeveria greke ka vendosur të mbulojë nevojat për maska të të gjithë nxënësve dhe mësuesve përmes autoriteteve lokale, në kontekstin e masave të reja për koronavirusin dhe hapjen e shkollave. Edhe Italia siguroi 11 milionë maska falas çdo ditë për të gjitha shkollat.
Mirëpo, në Shqipëri nxënësit dhe mësuesit janë të detyruar t’i blejnë vetë maskat, që nga ana e tjetër shiten me çmime abuzive, dhe qeveria në vend që t’i rregullojë këto çmime, vendos të luajë “tenderash”.
Ndoshta ministrja Kushi nuk e di, por blerja e maskave dhe dezinfektantëve nga prindërit çdo ditë ose një herë në disa ditë, përkthehet në një kosto më vete, sidomos në këtë kohë kur janë ekonomikisht më të rrënuar se kurrë.
Një maskë kirurgjikale njëpërdorimshe kushton minimumi 50 lekë (të reja), dhe për 5 ditë shkollë një nxënës duhet të shpenzojë të paktën 250 lekë, që në një muaj konvertohen në 1000 lekë. Po ashtu, kësaj kostoje i shtohet edhe xheli me përmbajtje alkooli 60%.
E kjo kosto më pas dyfishohet, trefishtohet etj. në varësi të numrit të fëmijëve për familje.
Ndërkohë, nëse këto maska, që të paktën në eBay kushtojnë 0.15 dollarë, do ishin një kosto tepër e vogël dhe shumë e domosdoshme nëse do mbuloheshin nga shteti.
Kështu, as ministrja Kushi nuk do kishte nevojë të merrej me teatralitete, duke u kërkuar llogari fëmijëve për moskryerjen e detyrës së saj.
