Debati që nisi në studio mes moderatorit Ermal Mamaqi dhe të dashurës së blogerit Nuseir Yassin, Alyne, ende nuk ka marrë fund. 15 ditë pas publikimit të emisionit “Xing me Ermalin”, përmes një video ajo gre një nga çështjet më problematike në vendin tonë, atë të seksizmit.
Në emisionin e 2 nëntorit, Alyne u prek pasi Kejvina e pyeti partnerin e saj: “Po gjithë këto udhëtime i bën për të takuar goca?”. Blogerja e njohur vendosi që të reagonte ashpër ndaj moderatorit, duke i treguar se të përdorësh femrën si objekt seksi nuk është një shaka, ndërsa nuk i mbajti dot as lotët.
Ditën e djeshme Alyne publikoi një video sqaruese, përmes së cilës do të evidentojë momentin kur ajo është ndjerë e fyer dhe të gjitha momentet kur, sipas saj një vajzë trajtohet si objekt seksizmi. Për këtë të fundit, ajo këmbëngul duke thënë se në program ka edhe shumë detaje të tjera, të cilat nuk janë argëtuese:
“Para emisionit, ai (Ermali) i fliste të dashurit tim për kolegen e tij mjaft seksi. Të përdorësh seksizmin për të tërhequr vëmendje, nuk është okej. Të përdorësh femrat si objekte, nuk është okej. Ajo që kuptova nga kjo video është se duhet të kontrolloj reagimin tim kur inatosem. Por ajo që mësova është se jam e lumtur që të paktën u përpoqa të flisja. Sepse nëse nuk do të flasim kur ndodh seksizmi në jetën tonë të përditshme, thjesht e lëmë që të vazhdojë të ndodhë. Ajo që dua të kuptoni nga kjo video është fuqia për t’i thënë “Jo” seksizmit. Shakatë për seksizmin nuk janë për të qeshur. Seksizmi nuk është një shaka”.
Alyne tregon në këtë mënyrë përgjigjen e saj, duke i dhënë forcë të gjitha femrave në Shqipëri që të reagojnë në situata të ngjashme.
