“Shqipëria organizoi dasmën e saj të dytë mbretërore pasi Mbreti Leka II u martua me të fejuarën prej kohësh, Elia Zaharia, në një ceremoni luksoze të shtunën”. Kështu nis artikulli i “Daily Mail” kushtuar eventit të një dite më parë, i shkruar nga Simon Holmes dhe i shoqëruar me imazhet e realizuara nga AFP, EPA dhe AP.
Më tej në artikullin e prestigjiozes kujtohet, se dyshja u fejua në Paris në vitin 2010, por nisën planifikimin për ditën e madhe vetëm disa muaj më parë.
“Dasma kishte të gjithë madhështinë dhe rrethanat e pritura për një ngjarje të tillë, me rreth 20 familjeve mbretërore nga e gjithë bota të pranishëm, duke përfshirë Princin Michael të Kentit, kushëririn e parë të Mbretëreshës Elizabeth II. Princesha Lea e Belgjikës dhe Mbretëresha Sofia e Spanjës ishin gjithashtu të pranishme në ceremoninë luksoze në kryeqytetin e Shqipërisë, Tiranë”, shkruan për disa nga detajet “Daily Mail”.
Prestigjiozja kujton se, “familja mbretërore e Shqipërisë u dëbua nga vendi në vitin 1939, pasi vendi u pushtua nga fashistët italianë. Pas Luftës së Dytë Botërore, kur komunistët morën vendin, Mbreti Zog, gjyshi i Mbretit Leka dhe familja e tij ishin konsideruar tradhtarë dhe ishin zhveshur tërësisht nga pushteti dhe u hoqën nga librat e historisë”.
Ndërsa të gjithë jemi të bindur se kjo e fundit (u hoqën nga librat e historisë) nuk ka ndodhur, dyshojmë se dora e një personi të afërt me Princin Leka ka ndërhyrë në realizmin e këtij artikulli.
“Sulejman Gjanaj, kreu i Lëvizjes së Legalitetit, një parti e vogël monarkiste e krahut të djathtë, tha për BIRN-in, se dasma do të miratojë statusin e familjes mbretërore shqiptare dhe do të sigurojë trashëgiminë e Mbretit Zog”, shkruan “Daily Mail”, duke vazhduar më tej me fjalën e Gjanajt.
Por në shkrim përmendet edhe fakti që, ceremonia u kalua me indiferencë nga disa prej të rinjve të Shqipërisë, “megjithatë disa të moshuar u shprehën se vendi ishte më mirë, kur familja mbretërore drejtonte para komunizmit”.
“Gjyshi i tij (Mbreti Zog) kontribuoi shumë në Shqipëri dhe ndërmori reforma për të përmirësuar ekonominë e vendit dhe madje edhe reformimin e jetës shoqërore në vend. Ne nuk duhet të harrojmë se, Mbreti Zog, një mysliman, u martua me një grua katolike, duke hapur rrugën për tolerancën fetare në vend. Shqiptarët gjatë kohës së tij ishin shumë më të lirë se në komunizëm. Por ishte komunizmi që u përpoq të shtrembërojë karakterin e tij”, citon “Daily Mail” fjalët e një pensionisti 70-vjeçar, Fatmir Qafa.
Por gazeta prestigjioze duket se në këtë rast bën një përjashtim dhe “shkel” një nga parimet bazë të gazetarisë: Palën e dytë. Në shkrimin e saj, ndryshe nga artikujt të cilëve iu referohemi shpesh, nuk është marrë asnjë prononcim pikërisht nga ata të rinj, ose persona, që u cilësuan se qëndronin indiferentë ndaj dasmës së Princit Zog. Ndërsa shumë prej jush, me të drejtë ose jo, pyesin: Kush fshihet pas këtij artikulli?
Burimi: Daily Mail/Iconstyle
