Falimentimi i bizneseve të rrugës “Myslym Shyri” në Tiranë prej projektit të Bashkisë, e cila ndërtoi korsitë e biçikletave pa standard të përcaktuar, pa respektuar plan-projektet e miratuara më parë dhe pa përfshirë banorët në vendimmarrje, ka shkaktuar debate të shumta.
Kujtojmë se ky projekt parashikon ngushtimin e rrugës së makinave dhe ndalimin e parkimit, gjë që ka ndikuar që shumë biznese në këtë rrugë të shpallin falimentimin. Policia nuk i lejon klientët të ndalojnë, madje edhe furnizuesit e kanë të vështirë, pasi gjobiten nga forcat bashkiake.
Këtë shqetësim e kanë shprehur njëzëri shumë biznese pak ditë më parë për “Gazeta Reforma”. Sipas tyre aksionet me gjoba në këtë rrugë synojnë zhvendosjen e klientelës drejt qendrave tregtare, pasi nuk ka asnjë kuptim që një rrugë tregtare të lihet pa parkim. (KLIKO)
Standardet e dyfishta nuk përbëjnë më habi!
Fatkeqësisht, “iconstyle.al” ka pasqyruar disa herë fakte të ndryshme që nxjerrin në pah se qeveria, e rrjedhimisht edhe Policia, veprojnë me standarde të dyfishta dhe kështu ka ndodhur edhe këtë herë. Kur bizneset në “Myslym Shyr” po falimentojnë për korsi biçikletash, këto të fundit, korsitë, dalin jashtë funksionit në rrugën “Sami Frashëri”.
Pranë gjimnazit “Petro Nini” gjendet një prej pikave të “SPAR”(rrjet marketesh), para të cilit kalon një korsi biçikletash. Mirëpo, për t’ia lehtësuar punën këtij biznesi, është sakrifikuar korsia dhe personat që lëvizin me biçikleta duhet të kalojnë në trotuar.
Sikundër mund ta shihni edhe në fotot e videon e mëposhtme para “SPAR” korsia e rezervuar për biçikletat është ndërprerë dhe aty bëhet shkarkimi i mallrave nga furgonat e marketit.
Kjo sjell kaos në lëvizjen e qytetarëve në këtë pjesë rruge, pasi trotuari përdoret njëkohësisht edhe nga këmbësorët edhe nga personat që lëvizin me biçikletë. Përveç kësaj, kemi të bëjmë me favorizime, pasi asnjë market a rrjet marketesh tjetër nuk e ka këtë “luks”.
Sikundër shqyrtonte pak kohë më parë “Gazeta Reforma”, rrugoret e kryeqytetit, në një monitorim të dedikuar përgjatë 12 orëve, ndëshkojnë 120 automjete të pushuara në kundërshtim me dispozitat e Kodit Rrugor, në rrugën “Myslym Shyri”, e cila shërben si një arterie kryesore për lidhjen e unazës së mesme me unazën e vogël dhe qendrën e kryeqytetit.
Pse favorizohen SPAR dhe qendrat tregtare?
Shumë biznese që u hapën pas pandemisë në rrugën Myslym Shyri e patën të vështirë të siguronin parkim për punonjësit, furnitorët, apo dhe klientët, sepse zona nuk ka hapësira të tjera për parkim.
Ky problem nuk është vetëm i bizneseve, por edhe i banorëve të kësaj lagjeje, pasi kjo zonë është kryesisht me pallate të vjetra, të cilat nuk ofrojnë mundësi parkimi, ndërkohë që hapësira te ish-“Ekspozita Shqipëria Sot”, e cila shfrytëzohej për parkim me pagesë, i ka kaluar privatit për ndërtimin e një ndërtese.
Pronarët e dyqaneve janë shprehur gjithnjë të revoltuar nga këto vendime të Bashkisë, duke theksuar se synimi i saj i vërtetë nuk lidhet me ndërtimin e korsive, por interesat e fshehura për tu ardhur në ndihmë olirgarkëve.
Si ndodh kjo? Bllokimi i rrugëve përpara këtyre bizneseve çon në falimentimin e tyre dhe kjo në “drejtimin me pahir” të qytetarëve drejt qendrave tregtare.
Pra, qendrat tregtare dhe SPAR dukshëm po favorizohen në këtë mes. Pyetje e madhe është “PËRSE” dhe cila është pika e përbashkët e tyre?
