Kryeministri Edi Rama, nëpërmjet një postimi në profilin e tij zyrtar në Facebook, u është përgjigjur të gjithëve në lidhje me planin ekonomik për të dalë nga kriza që shkaktoi Koronavirusi.
Ai thotë se ende nuk ka një plan, megjithatë në ditët në vazhdim ai do të jetë gati, pasi do kohë për t’u hartuar.
“Duke ndjekur komentet tuaja u them të gjithë atyre që pyesin për planin ekonomik të daljes nga kjo krizë humanitare që të bëjnë pak durim! Na duhen edhe disa ditë, ju lutem durim! Ju kujtoj tërmetin dhe ju përsëris: t’i bëjmë gjërat hap pas hapi që të mund të shkojmë në destinacion! Kini besim se çfarë është në mundësitë e kësaj toke, nuk do të mbetet pa u bërë!”, shkruan kryeministri.
Ndërsa për gjobat e miratuara, kryeministri Rama thotë se ato janë për të gjithë ata persona që shkelin rregullat e vendosura me qëllim ndalimin e përhapjes së Koronavirusit.
“Ndërsa kujt ankohet për gjobat e rënda të aktit normativ i them se gjobat nuk janë për popullin, po për shkelësit e rregullave të kësaj lufte dhe nuk janë për të mbledhur shteti para, po për të mbrojtur popullin nga shkeljet që në këtë situatë lufte kërcënojnë shëndetin e tij! Sa për një shembull: shkeljet sot kanë qenë afër zeros! Të vazhdojmë siç e kemi nisur, të bëjmë durim, të mos kërkojmë në një situatë lufte të zgjidhim brenda tre ditësh, të gjtha problemet e pasluftës! Frikë aspak, kujdes po!”, përfundon Rama.
Deri më tani, për qytetarët është bërë i mundur vetëm lehtësim nga bangat. Për 3 muaj këstet e kredive janë të ‘ngrira” dhe nëse nuk bëhet pagesa nuk do të ketë gjoba.
