Vetëm pak minuta pas raportimeve mediatike për plagosjen e menaxherit të shtëpisë diskografike Met Elshani në Prishtinë, Policia e Kosovës ka konfirmuar ngjarjen.
Në një njoftim për mediat, policia ka bërë të ditur se ngjarja ka ndodhur në lagjen “Dardania” rreth orës 15:00 dhe se i plagosuri është shtetasi M.E. (Met Elshani), i cili është dërguar në QKUK për të marrë ndihmë mjekësore pas plagosjes me armë zjarri.
I plagosur gjithashtu është dhe një 23-vjeçar, i cili gjithashtu po merr ndihmë mjekësore.
Mediat e Kosovës kanë bërë të ditur se Elshani ka marrë dy plumba në këmbë dhe është jashtë rrezikut për jetën dhe mësohet se policia ka vënë në pranga 4 persona si të dyshuar për ngjarjen e rëndë.
Ata janë:
Sh. C. mashkull , 20 vjeç, shtetas i Republikës së Kosovës
L.K. mashkull , 22 vjeç, shtetas i Republikës së Kosovës
Xh. B. mashkull , 43 vjeç, shtetas i Republikës së Kosovës,
Sakaq, i dyshuari i katërt, 23-vjeçari me iniciale A.K., ndodhet në spital pasi ka mbetur gjithashtu i plagosur.
Në cilësinë e provës materiale, policia ka sekuestruar 3 pistoleta dhe po vijon hetimet për zbardhjen e konfliktit të armatosur.
Ndërkohë, siç raporton “Indeksi Online” në ambientet e QKUK ka mbërritur Endri, një prej artistëve të rinj nën menaxhimit e Elshanit, i cili ka nxituar për të qenë pranë të tij.
Kujtojmë se Met Elshani gjithashtu ka nën menaxhim reperin Fero, grupi i së ciloit dyshohet të jetë i përfshirë në ngjarje.
