Një tjetër pistë e cila mund të ndryshojë gjithë historinë e krimit në Glyka Nera po hetohet nga Policia greke.
Babis Anagnostopoulos, i cili mbyti me jastëk bashkëshorten e tij në 11 maj, në sytë e vajzës së tyre 11-muajshe, mund të ketë qenë një trafikant droge i cili furnizonte kartelet. Piloti grek dyshohet se vrau gruan e tij britanike, Caroline Crouch, pasi kjo e fundit zbuloi për aktivitetin e tij.
Një prej dyshimeve bazohet tek pasuria dhe jeta e çiftit Anagnostopoulos që jetonte mes luksit, shtëpi 140 mijë paund, tokë 47 mijë paund dhe së fundmi pushime në Dubai.
Pavarësisht profesionit si pilot, Anagnostopoulos mund të ketë pasur një burim tjetër alternativ të ardhurash. Këtë pistë e konfirmon edhe babai i Caroline Crouch, David, i cili thotë se janë disa lidhje që e çojnë ish-dhëndrin e tij drejt bashkëpunimit me kartelet e drogës.
Nga ana tjetër, Babis ka mohuar për mediat greke që skenarët e tij lidhur me vrasjen e Caroline të jenë të vërtetë dhe është shprehur se mes tyre s’ka pasur asnjë të tretë.
“Unë i mohoj kategorikisht skenarët se ka pasur një person të tretë në jetën tonë. Gjithçka më intereson tani është e mira e fëmijës tim. Unë e dua Lydian time dhe do të jem pranë saj përgjithmonë, në gjithçka që ajo ka nevojë për mua. Unë jam i interesuar vetëm për të mirën e fëmijës tim dhe do të bashkëpunoj plotësisht në këtë drejtim. Do t’i jap të gjitha përgjigjet për pasaktësitë dhe pyetjet. Jam penduar për atë që kam bërë. E kam dashur shumë gruan time. Marrëdhënia jonë, përveç disa tensioneve, ishte një marrëdhënie krejtësisht normale” tha ai.
