Kompania Pfizer ka thënë se analiza përfundimtare e pilulës së saj antivirale Covid-19 tregoi efikasitet gati 90% në parandalimin e shtrimeve në spital dhe të vdekjeve te pacientët me rrezikshmëri të lartë, ndërsa të dhënat e fundit laboratorike sugjerojnë se ilaçi vazhdon të ketë efektivitetin e tij edhe ndaj variantit Omicron, raporton Reuters.
Prodhuesi amerikan i barnave tha muajin e kaluar se ilaçi oral ishte rreth 89% efektiv në parandalimin e shtrimeve në spital ose të vdekjeve, bazuar në rezultatet e përkohshme te rreth 1,200 njerëz. Të dhënat e publikuara të martën përfshijnë 1,000 persona të tjerë.
Askush në këto prova që u trajtua me medikamentin e Pfizer nuk vdiq, krahasuar me 12 vdekje mes atyre që morën trajtimin e zakonshëm.
Pilulat Pfizer merren bashkë me antiviralin ritonavir çdo 12 orë për pesë ditë, duke filluar menjëherë pas fillimit të simptomave. Nëse merr autorizimin, ky trajtim do të shitet si Paxlovid.
Pfizer publikoi gjithashtu të dhëna paraprake nga një provë e dytë klinike, që tregonin se ky trajtim reduktoi shtrimet në spital me rreth 70% në rreth 600 persona mbi 18 vjeҫ me rrezik standard.
“Këto janë rezultate mbresëlënëse,” tha në një intervistë shefi shkencor i Pfizer, Mikael Dolsten. “Po flasim për një numër të jashtëzakonshëm jetësh të shpëtuara dhe shtrimesh të parandaluara në spitale. Dhe sigurisht, nëse ky trajtim merret menjëherë pas infektimit, ka të ngjarë të reduktohet në mënyrë drastike edhe transmetueshmëria.”
Dolsten tha se ai pret së shpejti autorizimin nga Administrata e Ushqimit dhe Barnave e SHBA-së dhe agjenci të tjera rregullatore për përdorimin e këtij medikamenti tek individët me rrezik të lartë. Ai nuk beson se do të ishte i nevojshëm një takim i panelit këshillues të Administratës së Ushqimit dhe Barnave.
“Ne jemi angazhuar në dialog shumë të avancuar me agjenci rregullatore si në Europë, ashtu edhe në Mbretërinë e Bashkuar, si dhe po dialogojmë me shumicën e agjencive kryesore rregullatore në mbarë botën,” tha Dolsten.
Deri tani, nuk është autorizuar asnjë trajtim antiviral oral për Covid-19 në SHBA.
Dolsten tha se testimi i fundit laboratorik tregoi se aktiviteti kundër proteazës së variantit Omicron është “aq efektiv sa ndaj çdo varianti tjetër shqetësues të Sars-Cov-2”.
Kompania ka thënë se mund të përgatisë 180,000 paketa trajtimi këtë vit dhe planifikon të prodhojë të paktën 80 milion të tjera në vitin 2022.
Dolsten tha se Pfizer po kërkon të zgjerojë më tej prodhimin e këtij medikamenti, pasi variantet e reja, të tilla si Omicron, mund të rrisin ndjeshëm nevojën për antiviralë. Vaksinat aktuale duket se janë më pak efektive në parandalimin e infeksionit me Omicron.
/ Reuters
