Shqipëria ka tashmë 5 medalje të fituara nga talentet shqiptare në Lojërat Olimpike Speciale, që po zhvillohen në Berlin të Gjermanisë.
Pas medaljes së artë në not, të fituarnga Gersi Troka, vendit tonë i janë shtuar në koleksion edhe katër të tjera, dy argjendi dhe dy bronzi nga peshëngritësi Adi Sula. Ai ka arritur të marrë medaljet në disiplina të ndryshme.
Këto medalje tregojnë edhe një herë prirjen e shqiptarëve në këtë sport dhe pasojnë medaljet e shumta të fituara më parë nga Calja, Godelli apo Qerimaj, megjithëse asnjëri prej këtyre nuk ka mundur të marrë një medalje olimpike, por duhet thënë se në Olimpiadën e madhe konkurrenca është mjaft e madhe.
“Special Olympics Albania” përfaqësohet në Lojërat Olimpike Speciale të Berlinit me 10 sportistë, të cilët garojnë në sportet e notit, atletikës, basketbollit dhe peshëngritjes, ndërsa rezultatet janë inkurajuese dhe tregojnë që edhe kjo pjesë e shoqërisë mund të ndihmojë shumë në rritjen e emrit të vendit tonë në botë.
