Një modele indiane e shpërfytyruar nga një sulm me acid sfidoi kuptimin e bukurisë pasi u shfaq në pasarelën e Javës së Modës në Nju-Jork për të promovuar ndalimin e shitjes së lëndëve gërryese, të përdoruara masivisht për të shpërfytyruar mijëra femra dhe fëmijë çdo vit.
19-vjeçarja Reshma Quereshi e buzëqeshur hapi shfaqjen e FTL Moda, të enjten duke u duartrokitur, në një fustan të bardhë me mëngë të gjata të zbukuruar me dizajno të punuar me dorë. Fustani ishte realizuar nga dizajnuesja indiane, Archana Kochhar, gjatë udhëtimit të saj të parë në Shtetet e Bashkuara të Amerikës. Në kokë ajo mbante një kurorë të ndritshme.
Gumëzhima dhe magjia e eventit ishte një botë larg nga Allahbad, India, ku ajo vuajti djegien në fytyrë dhe humbjen e syrit dy vite më parë, pasi u sulmua me acid sulfurik nga ish-kunati i saj dhe dy meshkuj, në moshën 17-vjeçare.
“Kjo pasarelë ishte shumë e rëndësishme për mua, sepse ka shumë vajza si unë që janë mbijetuese të sulmeve me acid dhe kjo do t’ju japë atyre kurajë. Dhe gjithashtu do t’u tregojë njerëzve që gjykojnë bazuar në paraqitjen e jashtme, se nuk duhet të gjykosh një libër nga koveri, ti duhet të shikosh te të gjithë me të njëjtin sy. Unë asnjëherë nuk mendoja në ëndrrat e mia më të çmendura që diçka e tillë do të më ndodhte mua. Që unë do të vija në një vend kaq të madh për të ecur në një skenë kaq të madhe”, u shpreh Quereshi.
Ajo nuk mendonte kurrë se do të dilte jashtë shtetit, për më tepër të modelonte në Nju-Jork. “Nuk mund ta besoja se kjo po më ndodhte mua”, u shpreh ajo për udhëtimin, duke shtuar më tej: “Në atë moment u ndjeva tmerrësisht e gëzuar”.
Koleksioni i quajtur “A Tale of Two Cities”, ishte frymëzuar nga magjepsësi Taj Mahal dhe ngjyrat e gjalla të Indisë së mrekullueshme. Printimet nuk ndjellin vetëm Taj Mahal, por zambakun e ujit dhe elefantët mbretërorë.
Veshjet përfshinin pantallona me bel poshtë, bluze të shkurtra, pelerina dhe “jumpsuit”. Në pasarelë modeloi edhe aktorja Sunny Leone.
*Shfleto galerinë
Burimi: Daily Mail
