Meghan Markle mund të jetë një profesioniste e tapetit të kuq falë profesionit si aktore, por kjo nuk do të thotë se ajo është krejtësisht imune ndaj presioneve për të qenë në qendër të vëmendjes.
Tani që ka vendosur të martohet me princin Harry dhe të bëhet një anëtare e familjes mbretërore, aktorja ka një grup të ri përgjegjësish publike në horizont.
36-vjeçarja është pikasur shpesh duke prekur flokët e saj gjatë paraqitjeve publike me të fejuarin dhe sipas një eksperti të gjuhës trupore, kjo është një shenjë që Markle po përpiqet të qetësohet në mes të kaosit.
Duke folur për “Femail”, ekspertja e gjuhës së trupit dhe autore e “Body Language for Dummies”, Elizabeth Kuhnke zbuloi se taktika e flokëve të Markle-it është një gjest i zakonshëm që gratë përdorin për t’u qetësuar kur ndjehen nën presion ose në siklet.
“Është versioni i rritur i një fëmije që shtrëngon lodrën e preferuar, dorën e nënës ose dorën e babait kur ndihet i shqetësuar dhe nuk di se çfarë të bëjë apo të thotë,” tha ajo.
Megjithatë, Kuhnke shtoi se gjesti nuk ka kuptim të njëjtë kur Markle është në një ambient privat.
“Kur ndjehet nervoze – duke ditur se miliona njerëz janë duke shikuar dhe gjykuar – të ulësh kokën poshtë dhe të luash me flokët, është një tregues i gjendjes psikologjike të nevojës për të mbrojtur veten”, shpjegoi ajo.
Markle nuk është më duke përfaqësuar veten si një aktore, por si një anëtare e afërt e familjes mbretërore më të famshme në botë.
Burimi: Iconstyle.al
