Zjarret që pushtuan Athinën të hënën ishin një tragjedi e madhe për një nënë e cila humbi burrin dhe dy fëmijët e mitur.
Gruaja ka prekur zemrat e të gjithëve përmes një letre ku ka ndarë me të gjithë momentet e tmerrit. Vajza e saj, Evita, 13 vjeçe, u hodh nga shkëmbi në 15 metra lartësi në det dhe gjeti vdekjen, për t’u shpëtuar flakëve gjigande në Mati.
Ndërsa djali 11 vjeç, Andreas, vdiq bashkë me babain e tij 54-vjeçar, Grigoris. Ka qenë gazetari Babis Papapanagiotou, një mik i familjes së çiklistëve të njohur, i cili e lexoi live në “SKAI TV” letrën e nënës.
“Po përpiqem të jem si vajza ime e vogël, e cila gjithmonë ishte një luftarake që provoi në çdo mënyrë. E di që Grigoris do të kishte bërë gjithçka për t’i shpëtuar. Fakti që ai dështoi ishte thjesht vullneti i Zotit. Ende më kumbon në vesh zëri i frikësuar i Andreas:
“Kam frikë mami, jam shumë i shqetësuar, por do të qëndroj i fortë. Nuk dua që të vish, pasi gjithçka është mbyllur dhe ndoshta nuk ia del dot. “Unë u përpoqa t’i arrij ata, katër orë përpjekje që t’u afrohesha”, vazhdon letra.
“Më pas hoqa dorë nga përpjekjet, duke menduar që mos të rrezikoja as unë. Nuk kam fjale. Po përpiqem që të identifikoj familjarët e mi, pasi shteti e ka humbur plotësisht kontrollin në këtë drejtim-unë mund t’ju them se kam humbur gjithçka. Përqafoni fëmijët tuaj çdo ditë!”
