Prej disa javësh, në ekran na ka shoqëruar emisionin më i ri në “Top Channel”, “Për’puthen”.
Ky format i ri, i ngjashëm me “Uomini e Donne” në Itali, ka fiksuar publikun përpara ekranit dhe është kthyer në programin më të diskutuar.
Me siguri ta ka zënë veshi “Për’puthen” në kafe, nga kolegët e zyrës, nga shokët e shkollës apo bisedat e rastësishme të kalimtarëve.
(Si të mos mjaftonte “Për’puthen”, kemi gjithashtu “Love Story” në “TV Klan” por për këtë do të flasim ditë tjetër.)
Njohjet e të rinjve në ekran janë kthyer në kryefjalën e ditës nga e hëna në të premte, teksa të gjithë kemi vrarë mendjen se kush është shpirti i kujt binjak.
View this post on Instagram
Deri këtu gjithçka në rregull. Vajzat e djemtë janë tepër simpatikë, pëlqimet e para kanë lindur dhe ky format reality është tërheqës.
Mirëpo, më shumë se përputhje kemi parë përleshje gjatë këtyre javëve dhe një format ku askush s’e gjen dot gjuhën e përbashkët me tjetrin. Ofendimet në një emision prime time që ndiqet nga çdo moshë janë shembulli më i keq që televizioni na paraqet përpara syve, ndërsa përputhja në këtë format reality është thuajse e pamundur.
Por, le të ndalemi tek ‘reality’. A është vërtetë ky një reality-show?
E para konkurrente që u largua nga “Për’puthen” ishte Shqipe Hysenaj, e cila pasi u përlesh me të gjithë u pezullua nga emisioni me arsyen e shfaqjes së homofobisë dhe bullizmit ndaj personazheve të tjerë.
S’ka qenë një, por shumë raste kur Shqipja si gjatë emisionit, ashtu edhe në intervistat e saj pas pezullimit, ka rrëfyer se njerëzit në studio ishin fallco.
“Nuk do jua harroj kurrë dhe ta dini që me ndihmën tuaj dhe drejtësinë time do fundosen shumë veta.”- shkroi Shqipja në rrjete sociale pas largimit, duke treguar e para se diçka mbante erë. (Kliko)
Më tej, në një intervistë për “Prive”, ish-konkurrentja e cila gjithashtu kishte përmendur faktin se do të hidhte në gjyq opinionistin Arian Konomi, u shpreh se emisioni ishte real, por njerëzit brenda tij nuk ishin të tillë. (Lexo më shumë)
Kjo ishte goditja e parë për emisionin, e cila pasoi me një tjetër goditje nga Beart Rexhepi, një tjetër konkurrent që vendosi të largohej papritur nga ky format.
Largimi i tij, megjithëse nuk është komentuar ende në asnjë moment të emisionit “reality” dhe të gjithë po hiqen sikur s’kishte qenë kurrë aty, bëri bujë të maadhe në media e rrjete sociale.
Madje, pasi autorja e programit Olsa Muhameti deklaroi se do të shihej në gjyq me Beartin për shkak të deklaratave të tij të pavërteta të thëna publikisht, Bearti “plasi bombën”.
Në një status të gjatë në InstaStory ai tregoi se gjithçka ishte skenar, ndaj kjo ishte arsyeja që e kishte shtyrë atë të linte programin. (Kliko këtu)
Bearti rrëfeu se nuk kishte konkurruar fare për të marrë pjesë në emision, por ishte ftuar nga vetë autorja e “Për’puthen”, e cila sipas tij e detyronte çdo javë të dilte nga vetja dhe të bënte skandale në studio. (Ndërkohë që të gjithë presin që ky format të jetë reality.)
“Përshëndetje! Unë takimin me Oltën nuk e kam kërkuar pa arsye apo për famë, siç e paska transformuar apo interpretuar në mënyrën e vet Olsa. Unë famën e kam pasur dhe nuk më duhej aq “fama” e “Për’puthen”. Që të mos e zgjas, arsyeja e hyrjes ka qenë se më kanë ftuar vetë, por edhe të përjetoj një eksperiencë ndryshe, të bukur. Kurrësesi çfarë fitova. Unë me përfaqësimin tim në “Për’puthen” kam dashur që t’ua rris shikueshmërinë e emisionit edhe në Kosovë, ç’ka edhe qëndron e vërteta. Thjesht dhe aty të jemi bashkë si vëllezër të një kombi, sikur që edhe jemi.
Arsyeja pse unë doja takim me Olsën ka qenë se ajo kërkonte sa më shumë debate e skandale në studio. Unë nuk jam person që flas vetëm për ehh… jam edhe për debate, por jo skandaloze. E kam cekur shumë herë kur më është kërcënuar me fjalët “Fol diçka, debato ose do të të nxjerr nga “Për’puthen”. Dhe i kam thënë shumë herë që dua të dal vetvetja, jo të flas me zor dhe imponuar. Më lër rehat me karakterin tim, me atë që e kam edhe në jetën e përditshme, jo false dhe me maskën tuaj. Po fare mirë më kujtohet edhe kërcënimi yt “Nuk mund të dalësh kur të duash ti, se të ndjeki penalisht”.
Dy takimet e mia janë bërë në qendra reklamuese, në mobileri dhe estetikë duke shfrytëzuar çdo “lojtar” pa asnjë përfitim, me premtime të rrejshme, derisa e nënshkruajnë një kontratë e pastaj ndryshojnë fjalët e thëna.
Unë për të gjitha këto kam fakte që prej ditës së parë madje deri tek dita e fundit, me mesazhe, me video e voice dhe jam i gatshëm të përballem në gjykatë me ty! Edhe aty do jem Beart Rexhepi, me fytyrën time, me karakterin tim, i shpëtuar nga maska “Për’puthen”- shkruante ish-konkurrenti.
Të shumtë janë personazhet e tjerë të larguar që kanë mbetur në hije, ndërsa arsyet e tyre nuk i mësoi kurrë askush.
Si të mos mjaftonte kjo, çdo ditë ndjekësit reagojnë me komente të shumta ku i quajnë konkurrentët “aktorë” dhe formatin jo real.
View this post on Instagram
Videot e emisionit në Youtube kanë thyer rekorde klikimesh, mirëpo mjafton t’u hedhësh një sy komenteve për të kuptuar opinionin e vërtetë të ndjekësve lidhur me “Për’puthen”.
Kryefjalat e komenteve të tyre është “shtirje”, ndërkohë që në studio vazhdojnë të vijnë papritur “surpriza” në momentin e duhur që trazojnë ujrat dhe i japin një dinamike tjetër ngjarjeve, që supozohen të jenë sa më reale dhe spontane.
View this post on Instagram
Mos është vallë e pamundur të realizohet një show 100% reality në Shqipëri?
Për më shumë audiencë, qëllimi kryesor i “Për’puthen” u kthye në “Për’leshen”, ndërsa publiku pret ende me kuriozitet historitë “e vërteta” të pjesëmarrësve, të cilët të detyruar ose jo nga rrethanat, janë kthyer në aktorë që po luajnë rolet që i kanë caktuar.
