Pas dy vjetësh shkëputje nga televizioni, më në fund spikerja e njohur e “Top Channel”, Monika Stafa, është rikthyer në të njëjtin ekran.
Ajo u shfaq dje në edicionin qendror të lajmeve në orën 3:00, duke shënuar kështu rikthimin. Por me ardhjen e Monikës në “Top Channel”, një tjetër moderatore po mendon largimin.
“Prive” raporton se Beti Njuma është në negociata për t’u transferuar në televizionin “Ora News” dhe kjo lëvizje po bëhet pikërisht për raportin jo të mirë që Njuma ka me Stafën.
Dy spikeret kanë pasur disa mosmarrëveshje në vitin 2012, me kunja në editoriale gazetash e në rrjete sociale dhe që nga atëherë kanë një rivalitet në distancë.
Deri më tani, Beti ka pasur rol kryesor në lajme, ndërsa më pas ajo u shfaq në një zhanër tjetër, atë të jurisë së “Top Talent” ku tha në njërën prej puntatave se nuk e ka ndërmend të lëvizë nga televizioni.
Por, tashmë, vetëm pak javë pas, gjërat kanë ndryshuar dhe kjo ka bërë që ofertat për kalimin e Njumës në “Ora News” të shqyrtohen.
Burimet thonë që lëvizja drejt “Ora News” nuk është ende e konfirmuar dhe mund të mos ndodhë fare por pakënaqësitë e Betit, shfaqur befasishëm, janë evidente dhe po përfliten në korridoret e televizionit, shkruan “Prive”.
