Reshjet intensive të natës kanë shkaktuar përmbytje masive në Delvinë, Finiq dhe zonat përreth, ndërsa lumenjtë Bistricë dhe Kalasë kanë dalë nga shtrati duke përfshirë banesa, rrugë dhe tokë bujqësore. Situata është përshkallëzuar për shkak të zjarreve të verës, të cilat kanë djegur sipërfaqe të mëdha pyjore duke e bërë terrenin më të rrëshqitshëm dhe lumenjtë më të rrëmbyeshëm.
Qeveria ditë më parë paralajmëroi reshje dhe përmbytje, por megjithatë, rrugët e dëmtuara, urat e ngushta dhe mungesa e investimeve reale në argjinatura treguan se paralajmërimi nuk u shoqërua me masa konkrete në terren.
Çfarë po ndodh në vend?
Katër familje janë evakuuar në Delvinë dhe dy në Finiq pasi niveli i ujit në banesa arriti rreth 50 cm. Situata mbetet tejet kritike e konfirmuar edhe nga nënprefekti i Vlorës, Kristo Kiço pasi niveli i ujit është ende i lartë në argjinatura.
Nga përmbytjet është shembur ura në hyrje të Delvinës, duke izoluar banorët e Lefterhorit dhe Kakodhiqit. Po ashtu është shembur ura e Vanës, duke lënë të izoluar banorët e zonës.
Aksi kombëtar Kranë–Muzinë është i pakalueshëm për shkak të daljes nga shtrati të lumit Bistricë. Ndërkaq, në fshatin Shelegar, lumi i Kalasës ka vërshuar mbi rrugën nacionale Sarandë–Delvinë–Kardhiq.
Kryeplaku i fshatit fajëson urën e ngushtë dhe jashtë standardit:
“E kemi ngritur disa herë këtë shqetësim, por nuk na dëgjojnë. Ura është e ngushtë dhe nuk përballon dot prurjet.”
Për shkak të turbullimit të burimeve të Navaricës dhe puseve të Vrionit, është ndërprerë furnizimi me ujë të pijshëm në Sarandë dhe Delvinë.
Në segmentin e ri rrugor Qukës–Qafë Plloçë, prej ditësh qarkullojnë pamje dhe raportime mbi rrëshqitje të reja masive të dherave. Rruga që kushtoi rreth 260 milionë euro dhe u ndërtua për afro 14 vite, vazhdon të ketë probleme të përsëritura, duke ngritur dyshime serioze mbi cilësinë e ndërtimit.
Rrëshqitja e fundit ka bllokuar njërën korsi me inertë, duke e bërë qarkullimin të vështirë dhe të rrezikshëm.
Pas reshjeve të dendura në zonën e Librazhdit, ekipet e OSSH-së dhe shërbimeve publike kanë ndërhyrë për rikthimin e energjisë dhe pastrimin e akseve rrugore. Ndërkohë, në Fier, prurjet e lumit Vjosë po rriten me shpejtësi, duke rrezikuar disa fshatra përgjatë shtratit të lumit. Kryebashkiaku Armando Subashi paralajmëron se rreziku shfaqet kur niveli arrin afërsisht 6.5 metra.
Subashi u ka bërë apel banorëve të evakuojnë bagëtitë dhe të jenë të gatshëm për zhvendosje nëse situata përkeqësohet. Emergjencat civile në Fier ndodhen pranë Urës së Mifolit për ndërhyrje të menjëhershme, në rast se lumi del nga shtrati. Pavarësisht paralajmërimeve të përsëritura, qeveria duket sikur i përdor ato më shumë si alibi sesa si masë parandalimi. Paralajmërimi nuk e zhduk përgjegjësinë për infrastrukturën e braktisur, për rrugët e pambaruara, për kanalizimet që nuk ekzistojnë dhe për fondet publike që vidhen në vend që të përdoren për sigurinë e qytetarëve. Në çdo përmbytje del në pah i njëjti dështim strukturor: institucionet që duhet të parandalojnë dëmin, mjaftohen me njoftime, ndërsa detyra e tyre reale është të ndërtojnë, të mirëmbajnë dhe të mbrojnë. Këto përmbytje nuk janë “aksident natyror”, por pasojë direkte e keqqeverisjes.
