Një përleshje e përgjakshme ndodhi mes një grupi grekësh dhe shqiptarësh pak para orës 2 të mëngjesit të sotëm, në periferi të Athinës. Mediat greke raportojnë se nga konflikti kanë mbetur të plagosur 6 persona.
Shkaku i këtij konflikti nuk dihet ende, por policia është duke hetuar nëse ngjarja ka lidhje me vrasjen e një dite më parë të 35-vjeçarit Kostandinos Kacifas në Bularat të Gjirokastrës.
Pas vrasjes së të riut, i cili hapi zjarr mbi policinë shqiptare, në Athinë u mbajtën protesta para ambasadës së Shqipërisë.
Me flamuj grekë në duar, ata protestuan për vdekjen e Konstandin Kaçifës, ndërsa mbajtën edhe qirinj dhe nuk kursyen aspak thirrjet raciste ndaj shqiptarëve.
“Shqiptarët vrasës, po vrisni vëllezërit tonë në tokën greke”, ishte një nga thirrjet e dëgjuara gjatë tubimit para Ambasadës së Shqipërisë në Athinë. Ndërsa në një tjetër thirrje, u dëgjuan fjalët: “Çekiç dhe zjarr për qentë shqiptarë”.
Protestuesit ndërkohë kanë tentuar të futen më forcë në ambasadën shqiptare në Greqi, por policia greke ka rrethuar godinën më forca të shumta sigurie. Mediat fqinje raportojnë se u bllokuan edhe rrugët përreth ambasadës, ndërsa tonet janë shumë të ashpra në adresë të shqiptarëve.
