Emri i tij ka qenë i njohur prej kohësh në botën e muzikës, por për shqiptarët tërhoqi vëmendjen pas bashkëpunimit me Elvana Gjatën.
Poo Bear është një producent dhe tekstshkrues i njohur për bashkëpunimet e tij me emra me famë ndërkombëtare, mes tyre dhe Justin Bieber.
Tashmë ai ka zgjedhur një mënyrë për të bashkuar zhanret e ndryshëm të muzikës në një vend: në albumin e tij të ri të titulluar “Bearthday Music”, i cili bashkon artistë të rrymave “pop” apo latine.
Ai ka përfshirë në album bashkëpunimet gjatë dy viteve me super-yjet e muzikës, si Justin Bieber, Sam Smith, Jennifer Lopez, David Guetta, DJ Khaled dhe J Balvin.
Mes tyre dallon edhe emri i këngëtares shqiptare, Elvana me këngën “Shade”. Kjo e fundit ende nuk i është prezantuar publikut, pasi mund të jetë menduar që të publikohet pas daljes së albumit.
“Kaq mirënjohëse që jam përfshirë në këtë album mes kaq shumë talenteve dhe ikonave”, shkruan Elvana.
Kujtojmë se bashkëpunimi i parë i Elvana Gjatës me Poo Bear ishte vitin e kaluar me këngën “Forever is over” dhe duket se këngëtarja ka si qëllim të ndjekë rrugën e suksesit në skenën ndërkombëtare.
Burimi: Instagram/ Billboard
