Si një pemë por pa rrënjë, kështu është cilësuar Koronavirusi në Itali ditët e fundit, pasi 4 viktima u shënuan dhe mbi 200 të tjerë janë prekur në vetëm 2 ditë.
Degët dhe gjethet po rriten shpejt, por askush nuk e ka kuptuar ende sesi Koronavirusi ka gjetur ushqimin e nevojshëm për t’u përhapur.
Me rritjen e rasteve në të gjithë veriun e vendit, një pikëpyetje shtrihet nga të gjithë epidemiologët, virologët dhe specialistët e sëmundjeve infektive:
Duke qenë se askush nga personat e prekur nuk ka qenë kohët e fundit në Kinë, si u përhap virusi?
Nga tre personat e parë të prekur në Veneto dhe në Lombardi, nuk është mundur të gjendet origjina, domethënë kontakti i të paktën një pacienti me dikë që është kthyer nga Kina.
“I pari i infektuar është një italian që nuk ka qenë kurrë në Kinë”, thotë Giovanni Rezza, kreu i sëmundjeve infektive të Institutit të Lartë të Shëndetësisë.
Ndërkohë, Pier Luigi Lopalco, epidemiolog i Universitetit të Pizës, është i bindur se virusi ka mbërritur në Itali prej kohësh.
Por ka edhe një aspekt interesant që po shfaqet, përkatësisht prania e njerëzve asimptomatikë ose, siç thotë Rezza me simptoma të buta.
“Në një periudhë gripi si kjo që jemi, alarmi vjen vetëm për rastet më të rënda por ka shumë njerëz në shtëpi me sëmundje sezonale, mbi të cilat nuk bëhet asnjë hetim”.
Për këtë arsye Koronavirusi mbase është përhapur pas disa javësh nga mbërritja e tij.
/Repubblica.it
