Paragjykimi që mbrapa një femre të suksesshme dhe të pavarur ekonomikisht qëndron patjetër një burrë që merret me drogë, apo e thënë ndryshe një bos droge, fatkeqësisht ekziston rëndomë ende sot.
Dhe si për ironi të fatit këtë paragjykim e dëgjuam pikërisht sot, në ditën që shqiptarët nga ana tjetër po ngrihen dhe po marshojnë për të mbrojtur të gjitha vajzat që bien pre e abuzimeve seksuale dhe që në fund ato janë sërish që paragjykohen.
Ditën e sotme në emision “Kafe shqeto” me Flavio Qarrin ishte e ftuar këngëtarja e njohur Luar Arani.
Ajo foli për mbi suksesin e këngës më të fundit “Jetë”, si dhe për jetesën në Gjermani, por fatkeqësisht u ndesh edhe me një pyetje të sikletshme dhe seksiste.
Gazetari Flavio Qarri e ka pyetur për jetën e saj personale dhe pyetja e tij ishte pikërisht kjo: “je lidhur me ndonjë boss droge që s’duhet ta dimë apo si është puna?”
E habitur nga kjo pyetje aspak e zakonshme dhe sidomos e bërë ditën e sotme kur organizohen protesta (që sipas tij ai i ka promovuar dy ditët e fundit), Luar Arani ka gjetur fjalët perfekte për t’i treguar gazetarit apo dhe çdokujt që mendon kështu, që në fakt një femër e suksesshme mund t’ia dalë vetë, pa qenë e nevojshme për të patur një bos droge.
“Nëse një femër është e suksesshme dhe mban një apartament vetëm edhe ka një karrierë nuk do të thotë që ka patjetër një bos droge përkrah. Nuk e lidh djalin e mirë me bosin e drogës. Punoj në bankë dhe bëjë dhe muzikë. Po pres të marr dhe një qen”, është shprehur Luar Arani.
Më tej Flavio Qarri u shpreh se e tha në formën e shakasë, por ajo pyetje e tij nuk është pritur aspak mirë.
Madje pikërisht pyetja e tij “je lidhur me ndonjë boss droge që s’duhet ta dimë apo si është puna?” , sot u kthye në pankartë në marshimin kundër abuzimeve seksuale. Një formë ironie që godasin të gjithë meshkujt që kanë këto paragjykime për vajzat që ia dalin vetë në jetë dhe janë të suksesshme si Luar Arani.
Ky fragment nga intervista e Luarit dhe Flavios është diskutuar shumë edhe në rrjete sociale, duke kritikuar mënyrën se si ai u shpreh.
https://www.instagram.com/p/CBAuvANgbj4/?igshid=nkjqumgtmpas
“Sa e poshteruar ndihem une si femer kur mendoj qe akoma kemi kete mentalitet? Si mundesh, me cfare te drejte, te besh nje pyetje te tille nje vajze e cila cdo gje e arrin vet? Me fal, ekziston ndonje mundesi ne mentalitetin tone maskilist e seksist te mos e veme ne dyshim arritjen e nje femre? Apo gjithmone do bejme deklarata te tilla?”, ishte ky një postim që kritikoi ashpër pyetjen e gazetarit.
Ndërkohë nuk ka munguar edhe komenti i Flavios, i cili e ka theksuar se ishte në formën e batutës.
“E para protesta është në 16! E dyta për të ekzaltuar një vajzë indipendete pa bërë qoka mediokre ishte batuta për “bosin e drogës”. Të përshëndes dhe mos ngatërro protestë sot”, u shpreh Flavio.
