Fjolla Morina ka rënë në prangat e policisë së Kosovës ditën e sotme pasi kaloi disa muaj në arrati. Sipas “Telegrafit”, këngëtarja është arrestuar mëngjesin e sotëm, pasi është hasur nga policia në dyqanin e saj në lagjen Emshir të kryeqytetit të Kosovës.
Prej muajit Prill këngëtarja ishte shpallur në kërkim ndërkombëtar, pasi mbi të rëndon akuza për trafikim të armëve dhe municionit në Shqipëri.
Kjo vjen si pasojë e arrestimit të saj vitin e kaluar në pikën kufitare Kosovë-Shqipëri, ku ajo u kap me dy armë në makinë, teksa shoqërohej edhe nga bashkëshorti i saj, Fisnik Syla e një person i tretë.
Morina ishte mbajtur në arrest shtëpiak në Kukës për një muaj, por më pas ajo u arratis dhe policia e shpalli në kërkim ndërkombëtar.
Ajo u dënua në 25 mars nga Gjykata e Kukësit me 9 vite burgim, që pas zbritjes së 1/3 prej gjykimit të shkurtuar u bënë 6 vjet. Prokuroria kishte kërkuar vetëm 7 vjet, por Gjykata u tregua më e ashpër, pasi Gjykata më herët ndryshoi edhe klasifikimin e veprës penale nga armëmbajtje pa leje në trafikim të armëve.
Gjatë kohës që ishte në arrati, Fjolla Morina bëri disa udhëtime në shtete të ndryshme me partnerin e madje kurorëzoi dashurinë e saj me martesë në ishujt Maldives.
