“Iconstyle.al” ka denoncuar prej muajsh veprimtarinë e kompanisë celulare Vodafone, e cila përdor pa të drejtë të dhënat personale të klientëve dhe ish-klientëve të saj për qëllime marketingu.
Më në fund, Komisioneri për të Drejtën e Informimit ka treguar se kundrejt Vodafone dhe dy operatorëve të tjerë kryesorë të telefonisë celulare në vend është kryer një hetim.
Për dy kompanitë e tjera janë dhënë rekomandime, ndërsa u vendos që Vodafone të gjobitet pasi “shkeljet e gjetura gjatë hetimit administrativ ishin mjaft të rënda në lidhje me pëlqimin, përpunimin, transferimin, shkatërrimin e të dhënave personale të Pajtimtarëve apo grupeve të interesit”.
Në një dokument të hetimit administrativ, të datës 26 janar 2021, përmenden një sërë shkeljesh nga kompania Vodafone, ndaj dhe për këtë arsye është gjobitur me një shumë prej 1 milionë e 500 mijë lekësh. Nga hetimet e Komisionerit për të Drejtën e Informimit, është konstatuar se kompania celulare ka përdorur të dhënat personale të abonentëve të saj për fushatë marketingu.
1 milion e 500 mijë lekë është një shifër qesharake për këtë shkelje të madhe, kur Vodafone në Itali u gjobit për të njëjtën shkelje me një shifër shumë herë më të madhe.
Autoriteti italian mbikëqyrës i mbrojtjes së të dhënave personale (Garante per la protezione dei dati personali) ka gjobitur Vodafone me një shumë prej rreth 12,250,000 Euro për shkak të përpunimit të paligjshëm të të dhënave personale të miliona përdoruesve për qëllime telemarketingu. Përveçse duhet të paguajë gjobën, kompanisë italiane i është kërkuar të zbatojë disa masa të përcaktuara nga legjislacioni për mbrojtjen e të dhënave kombëtare dhe nga ai i BE-së.(LEXO)
Ndërkohë, kompania shqiptare po e kalon me dënimin më të lehtë këtë shkelje të madhe.
Para përfundimit të 2020-ës, “Iconstyle.al” ju ka bërë me dije se “Vodafone Albania” po përballet me një lumë largimesh të klientëve, teksa po bën çmos për t’i mbajtur me pahir ata që duan të largohen, ende në kompaninë e tyre. (KLIKO) Madje burime jozyrtare na bënë me dije se të paktën 1,000 klientë kanë bërë kërkesë për t’u larguar nga kjo kompani dhe të gjitha këto kërkesa janë lënë pezullur.
Ajo ç’ka po ndodh është se Vodafone vijon me mesazhe “promocionale” ndaj ish-klientëve, duke vijuar të përdorë pa të drejtë të dhënat e tyre. Në celularin e një qytetari që është shkëputur prej saj mbërrijnë ende mesazhe sipas së cilit ai mund të përfitojë ulje në e-Shop apo oferta të tjera të ndryshme duke qenë pjesë e “Vodafone”.
Në mënyrë të qartë dhe në shumicë institucionet rregullatore të tregjeve Autoriteti i Konkurrencës dhe Autoriteti i Komunikimeve Elektronike dhe Postare që lidhet drejtpërdrejtë me çështjen, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni.
Është pikërisht Neni 7 i Ligjit Nr.9918, datë 19.5.2008 (I ndryshuar) “PËR KOMUNIKIMET ELEKTRONIKE” që e detyronAKEP-i që të nxisë konkurrencën efiçente për sigurimin e rrjeteve dhe të shërbimeve të komunikimeve elektronike, facilitetet shoqëruese dhe shërbimet e tjera. Në pikën b. të tij thuhet se AKEP ndërhyn për të mbrojtur interesat e përdoruesve të shërbimeve të komunikimeve elektronike, për të mbrojtur të dhënat personale dhe privatësinë e përdoruesve.
Madje në raste të tilla, si ky për të cilin po flasim, kërkohet ndërhyrja e menjëhershme e AKEP dhe në Nenin 6 të këtij ligji thuhet se:
1.Autoriteti i Komunikimeve Elektronike dhe Postare është organi rregullator në fushën e komunikimeve
elektronike dhe të shërbimit postar, i cili mbikëqyr kuadrin rregullator të përcaktuar nga ky ligj, nga ligji për
shërbimin postar dhe nga politikat e zhvillimit, të përcaktuara nga Këshilli i Ministrave.
2. AKEP-i është një person juridik, publik, jobuxhetor, i pavarur, i cili e zhvillon veprimtarinë në përputhje me
legjislacionin në fuqi. AKEP-i në punën dhe në marrjen e vendimeve brenda kompetencave të tij është i pavarur.
AKEP-i e ka selinë në Tiranë.
