Është përcjellë sot për në banesën e fundit, 71-vjeçari F.M, i prekur nga Covid-19, i cili ndërroi jetë mbrëmjen e djeshme pas komplikacioneve me shëndetin.
Ishte vetëm bashkëshortja ajo e cila i dha lamtumirën e fundit, pavarësisht se prej 10-ditësh ndodhej e karantinuar në shtëpinë e saj në Kuçovë, që kur bashkëshorti i saj rezultoi pozitiv me koronavirus.
Në funeral ndodheshin edhe forca të shumta policore, për të verifikuar respektimin e masave të sigurisë gjatë përcjelljes së tij për në banesën e fundit.
Trupi i të ndjerit u transportua nga Spitali i Tiranës, direkt në varrezat e qytetit, duke shmangur zakonet e traditat shqiptare të ceremonisë mortore në shtëpi.
Ministria e Shëndetësisë bën me dije se 71-vjeçari me origjinë nga Kuçova, i trajtuar më herët në spitalin universitar “Shefqet Ndroqi”, prej 7 ditësh ishte shtruar në spitalin Infektiv dhe gjatë mbrëmjes pati një komplikacion të menjëhershëm kardiak arterial.
I moshuari vuante nga disa sëmundje shoqëruese: Kancer mushkërie, diabet mellitus, fibrilacion arterial dhe hipertension.
