Vetullat e trasha janë trendi i kohës dhe sa herë që shikoja një femër me vetulla të kuruara me kënd dhe që binin në sy si modelja Cara Delevingne, mendoja me vete: Po unë përse nuk i kam kështu!
Duke qenë se në pak muaj martohesha vendosa t’i bëja. Kisha lexuar por nuk kisha folur me askënd me përvojë para se të shkoja te estetistja në Tiranë. Fotot e vetullave që kishte bërë me “Microblading” në Instagram ishin nga më të bukurat që më kishin zënë sytë dhe kështu vendosa: Do t’i bëj!
Në ndryshim nga tatuazhet, “Microblading” nuk përdor gjilpërë për të dizajnuar, por një teh të veçantë që jep një rezultat natyral. Vetulla merr një pamje tejet natyrale sepse nuk mbushet e gjithë forma e vetullës, por nxirren qime të holla dhe të lakuara në drejtim natyral të rritjes.
Këto informacione i dija para se të shkoja në sallon, por jo ato që do të vinin pas bërjes së vetullës. Sot pas 5 muajsh vetullat e mia janë zbehur dhe nuk duken si të bëra. Sot mund të them se nuk jam bërë pishman për vetullën që kam, por nuk është ajo që doja dhe për arsyet e mëposhtme që do të doja t’i dija para se të shkoja te estetistja:
1.Javën e parë nuk duhet ta lash fytyrën dhe ta lagësh vetullën me ujë
Ishte një lajm i tmerrshëm që e mësova vetëm pasi bëra vetullat “Microblading”. Duke qenë se jam një tip që e laj shpesh fytyrën dhe e pastroj, e kisha shumë të vështirë të qëndroja larg ujit, veçanërisht kur lahesha. Gjatë javës me siguri do t’ju duhen 2-3 takime te parukierja. E njëjta gjë përsëristet edhe pas seancës së dytë.
2.Duhet një muaj që të dalë forma përfundimtare e vetullës
“Microblading” nuk mbaron me daljen nga estetistja. Dita e parë, vetulla do të duket më e bukur se kurrë. Më pas fillon një proces i gjatë i shërimit të vetullës dhe ndryshimi nis në ditën e 2-të dhe të 4-rt. Vetulla nis të errësohet. Behet shumë e errët dhe ti do të doje të mos dilje fare nga shtëpia. Në ditën e 5-7, lëkura poshtë vetullës nis të rripet dhe duket sikur po të bien vetullat. Në ditën 8-10 ka raste që dukesh sikur nuk ke vetulla fare, pasi ato zhduken për të dalë sërish në ditën e 14-të deri në atë të 28, kur do të shohësh dhe rezultatin përfundimtar.
3.Rezultati NUK është i njëjtë te të gjitha llojet e lëkurave
Për vetullat “Microblading” duhet të bësh dy seanca për arritjen e formës dhe ngjyrës së dëshiruar. Pas seancës së parë, vetulla ime e re nuk dukej gjëkundi. Ngjyra e përzgjedhur ishte tejet natyrale, por fijet u zhdukën pas 1 muaji dhe seanca e dytë ishte shumë e domosdoshme.
Dita e parë e seancës së parë
Një tjetër vajzë që kishte bërë seancën e parë i kishte perfekt. Sot që kanë kaluar 5 muaj nga seanca e dytë, vetullat e mia janë zbehur. Pyeta estetisten se përse nuk janë si muajin e parë dhe më tha që kjo varion nga llojet e lëkurës. Nëse e ke të yndyrshme, atëherë “Microblading” nuk do të zgjasë shumë.
1 muaj pas seancës së parë
4.Seanca e dytë është e domosdoshme dhe bëhet pas 30-40 ditësh
I gjithë problemi im para se të bëja vetullën ishte ngjyra. Jo vetëm i imi por i të gjitha vajzave që shkonin të estetistja dhe që kërkonin vetulla “natyrale”. Ngjyra zgjidhet në bazë të lëkurës dhe seanca e parë nuk mjafton për të pasur rezultatin që dëshiron. Seanca e dytë që bëhet pas 30-40 ditësh është e nevojshme për të forcuar ngjyrën dhe për të mbushur hapësirat boshe të vetullës.
5.Duhet të përdorësh krem mbrojtës nga dielli dhe sa më pak makijazh sipër
Mbrojtja nga dielli është super e nevojshme jo vetëm muajin e parë, por gjatë gjithë kohës. Gjithashtu kujdesuni që të mos përdorni shumë laps dhe makijazh mbi vetull pasi ndikon në shndërrimin e ngjyrës. Edhe nëse përdorni, bëni mirë ta pastroni menjëherë pasi të shkoni në shtëpi.
Vetulla pas 5 muajsh
Burimi: Iconstyle.al
Ndalohet kopjimi dhe ribotimi pa lejen e redaksisë
