Blogerja e njohur Armina Mevlani na ka mallëngjyer të gjithëve me një vendim që ka marrë për të ndihmuar vogëlushin që u dhunua në kopsht nga administratorja Anjeza Shabani.
Kjo e fundit ndodhet në burg ku po vuan dënimin me dy vite, por trauma që pësoi vogëlushi 4-vjeçar dhe pasojat e dhunës psikologjike duan kohë që të rikuperohen.
Për këtë ka menduar Armina Mevlani e cila ka marrë përsipër të mbulojë të gjitha shpenzimet për vogëlushin në fondacionin “Fëmijët shqiptarë”. Gjestin e rrallë të Arminës, e cila i ka kthyer buzëqeshjen të voglit e prindërve të tij, e bëri publik vetë Fondacioni në llogarinë zyrtare të “Facebook”.
“Vogëlushi që preku zemrat e mijëra shqiptarëve për shkak të dhunës që pësoi nga administratorja e një kopshti privat, (denoncuar nga emisioni investigativ “STOP”), tani do të jetë pjesë e shërbimeve të Qendrës Rajonale të Autizmit në Farkë. I shoqëruar nga prindërit, ai ju bashkëngjit festës tradicionale të fundvitit që Fondacioni Fëmijët Shqiptarë organizon për fëmijët e qendrave të autizmit, duke gëzuar së bashku me ta. Pas vlerësimeve të bëra nga stafi i specialistëve të Qendrës Rajonale të Autizmit, ditën e hënë ai do të fillojë terapinë ABA . Kjo terapi do të ofrohet falas për vogëlushin ndërkohë që kostot e shërbimit në Qendër do të mbulohen nga Armina Mevlani. 4-vjeçari që përloti shumë nëna shqiptare brenda dhe jashtë kufijve të vendit, falë kujdesit të prindërve që i kanë qëndruar shumë pranë gjatë kësaj kohe, sot i është kthyer buzëqeshja dhe qetësia”, shkruan Fondacioni Fëmijët Shqiptarë.
