Modelja e njohur, Gigi Hadid njoftoi sot në “Instagram” se do të dhurojë të gjitha të ardhurat e saj nga Muaji i Modës në ndihmë të Ukrainës, e cila aktualisht po përballet me pushtimin agresiv nga trupat ruse nën urdhrin e Presidentit Vladimir Putin.
Javët e fundit, modelja ka qenë në elementin e saj, teksa ecte nëpër pasarela për shfaqjet kryesore “Vjeshtë 2022” të Michael Kors, Versace dhe Vivienne Westwood dhe shumë të tjerë.
“Të kesh një orar të caktuar të Muajit të Modës do të thotë që kolegët e mi dhe unë shpesh prezantojmë koleksione të reja të modës gjatë periudhave zemërthyese dhe traumatike në histori”, shkruajti Hadid. “Ne nuk kemi kontroll mbi shumicën e orareve tona të punës, por do të donim të ecnim ‘për’ diçka. Duke ndjekur hapat e mikut tim (dhe koleges time modele) @micarganaraz, po zotohem të dhuroj të ardhurat e mia nga shfaqjet e “Vjeshtë 2022” për të ndihmuar ata që vuajnë nga lufta në Ukrainë, si dhe për të vazhduar të mbështes ata që përjetojnë të njëjtën gjë në Palestinë. ”
View this post on Instagram
Në më shumë se një mënyra, bota e modës është përpjekur të përdorë platformën e saj këtë muaj për të ndihmuar në përhapjen e ndërgjegjësimit për situatën e tmerrshme në Ukrainë.
Talentët ukrainas si stilistja e Bevza-s Svitlana Bevza dhe modelja Eugenia Dubinov kanë ndarë përvojat e tyre direkt nga Kievi. Në shfaqjen e sotme të Balenciaga-s, stilistja Demna Gvasalia, e veshur me blu dhe të verdhë, ia kushtoi shfaqjen e saj qëndrueshmërisë së ukrainasve.
Markat e mëdha – të tilla si “Net-a-Porter”, “Nike”, “Chanel” dhe “Louis Vuitton” – kanë ndaluar fare eksportet e tyre në Rusi.
