Pak javë më parë, kryebashkiaku i Tiranës Erion Veliaj njoftoi se pas shumë ditësh të kaluara në izolim dhe kujdesit maksimal, kishte arritur të mposhtte virusin Covid-19.
Madje, ai është shprehur i gatshëm të ndihmojë personat e prekur, duke dhuruar plazmën e gjakut të tij.
Gjatë fjalimit të tij në këshillin bashkiak, Veliaj ka ftuar gjithashtu anëtarë të tjerë të dhurojnë plazmën e cila po konsiderohet si kurë për të prekurit.
“Do jem i pari nga Bashkia si kryetar që do dhuroj plazmën për ata që kanë nevojë për këtë trajtim. Ndërkohë që ftoj të gjithë anëtarët e tjerë (që e kanë kaluar) të bëjnë të njëjtin veprim. Ka stigmë për ata që nuk dhurojnë, kur njerëzit kanë frikë dhe një lloj droje. Lipset solidaritet për ata që kanë droje që ta bëjnë këtë”- u shpreh kryebashkiaku.
Më herët, Veliaj rrëfeu se ishte djali i tij i cili ishte infektuar i pari. Më pas virusin e kishte marrë bashkëshortja e tij, Ajola dhe më pas kishte kaluar edhe tek vetë kryetari i bashkisë.
“Ishin takime jashtë pune. Asnjë nga kabineti i punës nuk rezultoi pozitiv, kështu që unë isha i vetmi. Ne e kaluam të gjithë në shtëpi, fillimisht u sëmur djali, me temperaturë 38, menduam se kishte dhëmballë, më pas hetimi profesional tregoi që kishte kaluar ai COVID, bashkëshortja dhe pastaj unë. Dhe u futa në karantinë. Ishin dy javë sfiduese, nuk ia uroj as armikut më të madh. Pak kujdes nuk na bën keq”- ka treguar ai.
