Ditën e sotme pjesë e rubrikës “Gjysma ime” ishte aktori dhe padagogu Petrit Malaj me bashkëshorten e tij, Anetën. Për herë të parë ai prezantoi të shoqen me publikun dhe të dy rrëfyen historinë e tyre të dashurisë.
Malaj tregoi se bashkëshorten e ka njohur në mbrëmjen e maturës së një kushërire të tij. Ata u shprehën se pasioni për artin ishte ajo që i bashkoi më shumë me njëri-tjetrin dhe ju dha mundësinë për t’u njohur më tej.
“Unë kam qenë student nga viti ’82-83 dhe shkoj në Vlorë tek dajot e mi. Unë nënën e kam nga Vlora dhe babai nga Tropoja dhe shkoj në Vlorë për të qëndruar disa ditë tek dajoja im. Kishte mbrëmjen e maturës vajza e dajos dhe na thotë dajoja a shkon dot me Dhimon dhe merreni vajzën se vajti gjatë kjo punë. Shkojmë për të marrë vajzën e dajos dhe ngelim brenda sepse na pëlqeu ajo mbremja që ata kishin. Na mbajtën dhe na ftuan brenda. Pikërisht kjo ka qenë nata e parë që unë kam parë Anetën. Pastaj jemi takuar në verë përsëri në plazh në Vlorë. Më pas shkuam dhe pak më tej, luajtëm me top volejboll, por përsëri ishim brenda një miqësie, njohjeje fare normale. Kur Aneta erdhi studente, fitoi konkursin dhe erdhi studente në fakultet. Padyshim që jemi parë diku në ato korridoret e fakultetit, më foli e pashë dhe më tha kam ardhur studente këtu”, rrëfeu Petrit Malaj.
Ndërsa bashkëshortja e tij tregoi:
“Viti i parë ishte shumë i vështirë, janë disa etyde që ne punojmë në vitin e parë dhe i kërkova ndihmë Petritit. Aty më dha një bllok që kishte etydet e veta, në faqen e parë të bllokut rastësisht kishte fotografinë e vetë që kishte dalë shumë bukur dhe sa herë hapja fletoren që të shihja etydet, fleta e parë ishte fotografia”.
