Pasi u cilësua nga fansat si reklama më ofenduese, “Pepsi” vendosi që ta hiqte përfundimisht videon me modelen Kendall Jenner nga “YouTube”. Marka bëri një deklaratë ku u kërkonte falje shikuesve, duke sqaruar se reklama e re “nuk qëlloi në shenjë”.
Gjithashtu deklaroi se çdo “hap tjetër i fushatës do të ndalohej”.
“Pepsi” po përpiqej të projektonte një mesazh ndërkombëtar uniteti, paqeje dhe mirëkuptimi. Është e qartë se humbëm shënjestrën dhe kërkojmë ndjesë. Nuk kishim ndërmend që të ndiznim asnjë çështje serioze. Po tërheqim përmbajtjen dhe po ndalojmë çdo hap të mëtejshëm. Gjithashtu kërkojmë ndjesë për vendosjen e Kendall Jenner në këtë pozicion”, thuhet në deklaratën zyrtare në “Pepsi”-t.
Ky nuk është reagimi i parë i markës, e cila fillimisht vendosi që t’i qëndronte idesë se, “është një reklamë ndërkombëtare që reflekton njerëz që vijnë nga jetë të ndryshme, të cilët bashkohen me shpirtin e harmonisë dhe mendojmë se është një mesazh i rëndësishëm për t’u përcjellë”.
Përdoruesit e mediave sociale kritikuan modelen dhe reklamën për përvetësimin e kulturës së rezistencës dhe të protestës për të shitur pijen me gaz.
Burimi: Harper’s Bazaar
