Rovena Dilo ka qenë gjithmonë shumë e rezervuar për jetën e saj private dhe asnjëherë nuk ka folur për lidhjet romantike. E ftuar së fundmi në emisionin “E diela shqiptare” këngëtarja e njohur ka rrëfyer si kurrë më parë gjithçka që nuk dinim për raportet e saj me meshkujt dhe historitë e së shkuarës.
Ajo ka pasur dy histori dashurie që kanë marrë fund, t ë cilat i ka ditur edhe publiku, ndaj Ardit Gjebrea e pyeti përse nuk ka pasur një stabilitet në jetën e Rovenës.
“E shikoj si stabilitet edhe lëvizjen. Varet nga këndvështrimi. Unë kam pasur marrëdhënie të mira, të gjata, të stabilizuara por që kanë pasur një fund. Por kjo nuk do të thotë që nuk kanë qenë serioze, nuk e kanë kryer ciklin apo nuk kanë qenë të plota. Pse nuk kanë vazhduar? Mendoj se ndoshta sepse nuk më është dashur të bëj kompromise deri në fund. Kur vjen një fëmijë, njeriu bën kompromise me partnerin. Marrëdhënia është e mbushur me kompromise. Çdo marrëdhënia ka brenda kompromise. Sigurisht që kam bërë, marrëdhënia ka toleranca, të lëshosh pe, të duash etj. Ka momente që lodhet marrëdhënia, ka njerëz që e durojnë këtë lidhje dhe ka të tjerë që jo. Dhe kur nuk ke fëmijë, nuk e pyet veten, nuk bën kompromis. Kurse mua kjo gjë më nuk më ka ardhur dhe s’më është dashur të bëj të tillë kompromis, të vazhdoj një marrëdhënie që mendoj që është e lodhur, ta vazhdoj për hir të kësaj gjëje
Dashuria ime e parë ishte e fortë dhe e gjatë, zgjati gati 12 vite. Do kishte një drejtim tjetër jeta ime nëse nuk do të kisha kokën mbrapa. U ezaurua, njerëzit nuk rriten njësoj. Ka njerëz që rriten dhe të tjerë jo. Mendoj se një vajzë kërkon babain, nuk kërkon ndoshta një model tjetër, kërkon diçka të ngjashme me atë që ka parë çdo ditë. Dhe unë thellë-thellë mund të kem kërkuar babain dhe se kam gjetur. Jam e lumtur që kam pasur këtë jetë dhe këto ndjesi. Pasionet mbarojnë, ajo që i mban njerëzit është të jenë shokë, të mirëkuptohen, të mos nervozojnë njëri-tjetrin, të ushqejnë nga pakëz dashurinë”, është shprehur Dilo.
E pyetur nëse është penduar për ndonjë humbje në jetë, ajo u përgjigj shkurt “jo”, duke shtuar se është shumë kokëfortë. Ndërkohë për lidhjen me balerinin 15 vite më të ri se ajo, tha se do të donte që diferenca të ishte 7 vite, sepse lidhja do të kishte qenë më jetëgjatë.
