Ndërsa ishte nisur drejt Parlamentit, ku pritej të betohej si deputeti më i ri, Ralf Gjoni u has me një situatë të pakëndshme në hyrje të pallatit ku banon.
Kandidati për deputet i LSI-së mësohet se u sulmua me bojë, sapo doli nga banesa, në zonën e Liqenit të Tiranës.
“Duke dal nga shtëpia tek dera e pallatit, kisha edhe vajzën lart me mamanë, një djalë po priste tek kafeneja ngjitur me derën e shtëpisë dhe çohet në këmbë më afrohet dhe më hedh bojë me anë të një shiringe. Nuk e prita dhe më frikësoi në fillim se ishte e papritur, por dua të them që ai dhe ajo, që e ka përsëritur këtë lloj sjellje rrugaçërie, duhet ta dinë që unë kam ardhur për t’u betuar dhe nuk frikësohem për asnjë moment për këtë lloj destabilizimi, që po përpiqen të mbjellin në vendin tonë. Jam këtu që të përfaqësoj të gjithë ata të rinj, të reja, prindër fëmijësh, që kanë shpresë se ky vend mund të bëhet. Do të flas më vonë pas betimit”, mësohet të ketë sqaruar situatën Gjoni për gazetarët.
I pyetur nga gazetarja nëse kishte ndonjë mendim se kush mund ta kishte porositur sulmin ndaj tij, Ralf Gjoni u shpreh:
“Ju mund ta merrni mend më mirë se unë. Policia besoj se po bën verifikimet”.
Kandidati për deputet i LSI-së do të zëvendësojë Klajda Gjoshën, e cila dogji mandatin e deputetes.
Sot pritet që të betohen si deputetë më të rinj dhe kandidatët Nimeta Musai dhe Enada Koçiraj. Ndërkohë opozita do të mblidhet në protestë në orën 11:00 para Parlamentit.
Burimi: OraNews
