Pak ditë më parë, politikani Neritan Ceka mallkoi të gjithë ata shqiptarë që do të votojnë më 30 qershor!
I ftuar në emisionin “360 gradë”, mendimin e tij për zgjedhjet Ceka e përmblodhi me thirrjen për të mos votuar, por që u kthye në një mallkim për të gjithë votuesit:
“Shqiptarë më 30 qershor ju vraftë Zoti nëse shkoni në votime. Jeni të marrë dhe ju vraftë Zoti! E kam te drejtë se unë me shokët e mi e kam dhënë këtë vote që duan ta shpërdorin më 30 qershor, i zëntë bukën e kalamajve!”
Por pasi u bë bujë me deklaratën e tij e cila u kthye edhe në meme-t më qesharake të Instagramit, politikani është tërhequr. Ai ka çmallkuar të gjithë ata që do të shkojnë të votojnë më 30 qershor, sikur vërtet t’u besonte këtyre gjërave.
“Falenderoj të gjithë facebook-sat për këtë ngritje të papritur të realitetit tim. Kisha kohë që merresha vetëm me arkeologji edhe që më vunë në nivelin e Gjushit dhe Noces, por në një drejtim në krah të kundërt. Tani mallkoj dhe çmallkoj dhe po e them publikisht. Çmallkoj të gjithë ata që për ideal të partisë, për të cilën nuk duan bukë as ujë, të shkojnë të votojnë në 30 qershor. Çmallkoj të gjithë ata sidomos ata të lagjes sime, se unë jam tek lagja 5 ku janë gjithë sekretarët e komitetit qendror madje njëra me tha me atë që bën po pengon reformën zgjedhore”, përfundoi Ceka.
