Aktori me famë botërore, Johnny Depp ka vizituar Serbinë për arsye profesionale.
Ai ka mbërritur në Beograd për premierën e serialit të tij të animuar të prodhuar në Serbi “Pafini”, prodhuar nga “Archangel Studio” nga aktori Milos Bikovic.
Menjëherë pas ardhjes në këtë qytet, ai i është drejtuar presidencës ku dhe e ka pritur presidenti i Serbisë, Aleksandër Vuçiç.
Ky i fundit u shpreh se ishte mjaft i nderuar me ardhjen e aktorit dhe madje mori dhe një dhuratë nga Depp në lidhje me rolin e Jack Sparrow në filmin “Pirates of the Caribbean”.
Po ashtu, Vuçiç i ka dhënë vëmendje të madhe kësaj vizite duke publikuar disa imazhe me aktorin në llogarinë e tij personale në Instagram.
“Jam i nderuar me ardhjen e Johnny Depp në vendin tonë, i jam veçanërisht mirënjohës për dhuratën e mrekullueshme që mora”, ka shkruar ai.
Kujtojmë se aktori rrëmbeu së fundmi Çmimin e Nderit “Donostia” në Festivalin e 69-të Ndërkombëtar të Filmit që këtë vit u zhvillua në San Sebastian të Spanjës.
Depp u shfaq pas shumë kohësh për herë të parë në publik qëkur ka nisur përplasjen ligjore në gjykata me ish-bashkëshorten, e cila ka ngritur akuza të rënda ndaj tij, si dhuna e përsëritur fizike gjatë periudhës kur ata ishin çift.
