Komediania dhe moderatorja e famshme Ellen DeGeneres gjatë një interviste radiofonike për emisionin “Armchair Expert” nga Dax Shepard, tregoi ndjenjat që përjetoi pasi tregoi hapur prirjet e saj homoseksuale.
Për herë të parë që nga viti 1997 ajo rrëfeu për depresionin që kaloi, pasi pranoi publikisht që është lesbike. Vendimi për të dalë hapur mbi orientimin e saj seksual, jo vetëm që thuajse i shkatërroi karrierën, por gjithashtu nuk u ndje e mirëpritur në komunitetin LBGT.
Përfaqësuesit e LGBT i kthyen kurrizin pasi pretendonin se Ellen nuk kishte bërë asgjë të mirë për këtë komunitet.
Gjithashtu miku i saj, Elton John, asokohe u shpreh për median amerikane se moderatorja ishte thjesht një qaramane lesbike, e cila duhet të ndalojë së ankuari dhe të bëjë humor.
Reagimet e miqve të saj dhe humbja e punës e bëri atë të kalonte një gjendje të rëndë depresioni.
“Isha aq e humbur nga depresioni saqë natën nuk vija gjumë në sy, qëndroja zgjuar dhe vetëm shkruaja në letër mendimet e mia dhe pyesja veten përse të gjithë më kthyen kurrizin dhe nuk më lejuan të isha vetvetja”, rrëfeu Ellen.
Burimi: Daily Mail
