Rrugëtimi i saj në muzikë nisi në 2012-n me “X Factor”, por edhe pse është shkëputur nga skena, Antonela Cekixhi ka zgjedhur të tregojë pasionin për muzikën përmes videove të shpërndara në Instagram. Zëri i saj u përzgjodh mes 2000 të tjerëve nga një prej këngëtarëve latinë më të njohur në botë. Maluma përzgjodhi coverin e Antonela Cekixhit për ta publikuar në profilin e tij në Instagram, dhe më pas suksesi i saj sa vinte dhe shtohej.
J Balvin komentoi në coverin e saj dhe më pas Pablo Alboran publikoi në profilin e tij një cover të Antonelës. Dhe fakti që coverat e këngëve më të njohura janë në gjuhën spanjolle nuk është një rastësi për Antonelën. Në një intervistë për “Iconstyle.al”, këngëtarja rrëfen se e adhuron shumë këtë gjuhë dhe personifikohet prej saj.
Ajo madje i bën një kërkesë të drejtpërdrejtë kantautorit Flori Mumajesi, për të bërë një bashkëpunim dhe për të realizuar një hit në spanjisht, ndërsa nuk ngurron të falënderojë të gjithë artistët shqiptarë për mbështetjen që i kanë ofruar. Antonela tregon edhe “dëshirën më të madhe që ka për momentin”. Për më tepër ndiqni intervistën ekskluzive për “Iconstyle.al”.
Kemi kohë që nuk të kemi parë të angazhuar në një skenë, me çfarë po merresh aktualisht?
Pas “X Factor”, fillova studimet e mia universitare për Financë Bankë dhe iu dedikova tërësisht shkollës. Aktualisht sapo jam diplomuar në Bachelor dhe jam duke aplikuar për programe studimi master jashtë Shqipërisë. Sigurisht qe edhe muzikën nuk kam dashur kurrë ta lë mënjane dhe e kam vazhduar duke u përqendruar me shume tek cover-at të cilët i postoj në profilin tim në Instagram.
Cilat janë planet e tua të afërta për muzikën?
Për momentin nuk kam një plan konkret apo projekt muzikor të afërt, do të doja të vazhdoja me cover-at dhe të krijoj një profil akoma dhe me të theksuar për sa u përket cover-ave të këngëve latine pasi mendoj se kjo është diçka e veçante e cila më specifikon.
Si të lindi ideja e postimit të covera-ve në Instagram? Cili është qëllimi i vërtetë që i publikon?
Gjithçka nisi si kënaqësi, në fillim vetëm i regjistroja dhe i mbaja në celularin tim por më pas, mu duk interesante ideja e krijimit të videove dhe publikimit në Instagram. Nuk e mendoja që do të merrnin aq shumë shikime e pëlqime e aq më tepër vëmendjen e artistëve të cilët vete i kanë krijuar, pasi sot në Instagram gjenden me mijëra cover-a të tillë. Qëllimi i vërtetë mbetet thjesht kënaqësia, prezantimi i diçkaje interesante për publikun dhe mbajtja gjallë e pasionit më të madh që kam, muzikën.
Pse ky fiksim pas këngëve latine?
E adhuroj shume gjuhën spanjolle, ia di pothuajse të gjitha thekset dhe më pëlqen shumë ta dëgjoj, ta flas dhe sigurisht ta këndoj. Gjithnjë e kam konsideruar si një rrymë që më personifikon dhe më shkon shumë. Por vetëm kohët e fundit kam vendosur të publikoj video me cover-a në spanjisht.
Si u ndjeve kur pe se J Balvin dhe Maluma pëlqyen videon tënde?
Janë absolutisht dy nga këngëtaret më të suksesshëm të momentit, jo vetëm në vendet spanjisht-folëse por në të gjithë botën. Mund të ndihem vetëm mirënjohëse dhe e lumtur. Video-ja ime ndodhet në 20 videot që Maluma ka përzgjedhur në Instagram ndërmjet me shumë se 2000 cover-ave ndërsa J Balvin komentoi në coverin tim duke më falënderuar. Gjithashtu një këngëtar mjaft i njohur spanjoll, Pablo Alboran publikoi në profilin e tij një cover timin të një prej këngëve të tij të fundit. Të tre këto reagime ishin të paparashikuara për mua.
E ke menduar ndonjëherë të konkurrosh në kompeticionet muzikore jashtë kufijve shqiptarë?
Le te themi qe kjo është dëshira më e madhe që kam për momentin për sa i përket muzikës. E nëse kam mësuar diçka nga këto momente të bukura që më kanë ndodhur është që të vazhdoj të besoj dhe asnjëherë mos limitoj potencialin tim. Kështu që le të shpresojmë që një ditë dhe kjo ëndërr do të bëhet realitet.
A ke marrë ndonjë mesazh apo kompliment nga ndonjë artist i njohur për videot e tua?
Për sa i përket artistëve shqiptarë, shumë kanë qenë ata që kanë shpërndarë videot e mija, si për shembull Flori Mumajesi, Klajdi Haruni, Ledina Celo, Olti Curri. Gjithashtu kam marrë mesazhe përshëndetëse dhe përkrahëse nga Alketa Vejsiu, Eneda Tarifa, Dj Aldo, Elena Ora etj.
Me kë do të doje një bashkëpunim nga këngëtarët shqiptarë?
Them se me Flor Mumajesin do e bënim hit një duet në spanjisht.
Kë do të veçoje për zërin më të bukur live nga këngëtarët shqiptarë?
Do të vecoja: Aurela Gaçe, Rona Nishliu, Elhaida Dani, Eugent Bushpepa.
