Drilon Hoxha është kthyer në një prej personazheve më të komentuar në mediat rozë me projektet e tij si aktor dhe producent.
Filmi “Drejt fundit” ishte projekti që mori famë dhe e bëri Drilonin një aktor të njohur, pasi kishte tentuar të bëhej fillimisht një aktor humori në “Portokalli”.
Para pak muajsh i ftuar në emisionin “Mos i fol shoferit” me Rudina Dembacaj ai u shpreh se e kishte penguar dikush që të vazhdonte karrierën në “Portokalli”.
“Kisha qejf të futesha në ‘Portokalli’, por një ish-koleg i imi dhe i joti që drejtonte dhe s’po e përmendim, u ankua që bëja rolet e tij, Berishën. Po unë nuk mendoja të haja bukë me rolin e Berishës, e bëja për qejf” –tha Driloni në intervistën me Dembacaj.
Pas kësaj e gjitha u interpretua si referim ndaj aktorit Agron Llakaj, i cili interpretonte Berishën dhe ishte drejtues i programit.
Mirëpo i ftuar sot në “Një kat më lart” Hoxha sqaroi se nuk kishte përmendur kurrë emrin e Agronit.
“Nuk kam thënë Agroni, s’kam asgjë me Agronin. Dikush ka qënë brenda, nuk e di kush është ky dikush, por është një i brendshëm.Unë kam qënë fans i Agronit dhe thjesht kisha shkuar të bëja disa imitime për të parë nëse bëja për këtë punë. Ndoshta ka qënë ai, ndoshta dikush tjetër” – tha aktori.
Më tej i pyetur nëse kishte reaguar ndaj tij Agron Llakaj,Driloni tha se kurrë nuk kishte marrë një mesazh nga ai dhe nuk beson se Agroni e ka parë me atë sy.
