27-vjeçari nga Kavaja i cili u raportua si viktima e dytë më e re nga COVID-19 në vend, nuk ka vdekur nga virusi!
Shërbimi Infektiv ka bërë me dije se i riu ishte asimptomatik dhe vuante nga një sëmundje e lindur e gjakut!
Sipas njoftimit, 27-vjeçari ka ndërruar jetë si pasojë e aksidentit vaskular cerebral.
“Ministria e Shëndetësisë sqaron se, referuar shërbimit infektiv, një i ri 27 vjeçar nga Kavaja, ka ndërruar jetë si pasojë e aksidentit vaskular cerebral. 27 vjeçari vuante nga një sëmundje e lindur e gjakut dhe ishte asimptomatik për COVID19. Ministria e Shëndetësisë i shpreh ngushëllime familjes”, thuhet në njoftim.
Ndërkohë këtë të premte u shënua edhe një tjetër viktimë nga koronavirusi në Spitalin Infektiv, ku ndërroi jetë një 44-vjeçare nga Durrësi.
Viktima 44-vjeçare ka lënë pas një vajzë 13-vjeçare.
Të enjten u raportua se tre qytetarë nuk e kanë fituar dot betejën me COVID-19, një 77-vjeçare dhe një 83- vjeçar nga Tirana me sëmundje bashkëshoqëruese dhe një 68-vjeçar nga Hasi pa sëmundje të tjera.
Bilanci nga pandemia vijon të thellohet çdo ditë dhe tashmë numri total i vdekjeve ka shkuar në 124.
/Iconstyle.al
