Protesta e sotme e studentëve e ka bërë Ministrinë e Arsimit të tërheqë vendimin për tarifat e provimeve të mbartura. Ishte ministrja Lindita Nikolla që doli në konferencë për të bërë të ditur shfuqizimin e pikës 4 të VKM për provimet e mbartura.
Por sërish në një konferencë të dytë Nikolla tha se studentët nuk kanë marrë informacionin e duhur dhe po ngrihet një grup pune që të analizojë pikat e tjera të VKM-së. Gjithashtu ajo shtoi se duhet krijuar një dialog për përmirësimin e ligjeve të universitetit.
“Kam marrë një reagim inkurajues nga disa këshilla studentorë. Kjo protestë e studentëve tregoi para së gjithash se sa pak informacion dhe sa pak komunikim kishte jo vetëm tek ligjet, por edhe reforma. Ndaj më shumë se sa rëndësi thjeshtë dhe vetëm për shfuqizimin e pikës 4, kjo protestë ia vlejti dhe sherbeu si katalizator për një debat shterues brenda universitetit. Besoj që kjo është rruga e duhur që ne të përmirësojmë shumëçka dhe të ndërtojmë një dialog. Ministria ti bëjë transparenet dhe ti bëjë publike të gjithë informacionet. Kam marrë një kërkesë nga këshillat studentorë që e miratoj me të dyja duart, që të ngrihen grupe pune për 3 pikat e tjera. Jam shumë dakort për të ndërtuar një dialog ku çdo aktor në jetën e universitetit të bëjë transparente gjithçka bëhet në jetën universitare” – tha ministrja e arsimit.
Ndërkohë studentët vazhdojnë të protestojnë para godinës së Ministrisë së Arsimit pavarësisht lajmit të ministres Lindita Nikolla se është shfuqizuar pika 4 e VKM për pagesë ekstra për provimet e mbartura.
