Shembja e Teatrit Kombëtar dhe rindërtimi i të riut ka qënë tema më e diskutuar së fundmi në të gjitha mediat. Mes mendimeve pro dhe kundra aktorët e teatrit janë mbledhur për të diskutuar bashkë me kryebashkiakun e Tiranës Erion Veliaj.
Dhe gjatë ditës së sotme Veliaj ka bërë me dije se ka rritur një marrëveshje me aktorët, të cilët kanë rënë dakort për rindërtimin e një teatri të ri.
Një nga aktorët pjesëmarrës të marrëveshjes ka qënë edhe aktori i njohur Alfred Trebicka, i cili ka dhënë më shumë detaje mbi takimin me Veliajn.
Për “Gazetën Shqiptare” Trebicka u shpreh: “Nuk është se ka ndonjë marrëveshje përfundimtare. Ka marrëveshje në kontekstin e negociatave që po vazhdojnë. Kjo është një punë që nuk bëhet me një takim dhe me një fotografi. Ajo që ne diskutuam me të ishte hapja e konkursit ndërkombëtar për këtë projekt që është. Ne ngulëm këmbë që kjo të bëhet patjetër”.
Ndërkohë aktori foli edhe për çështjen e truallit duke thënë: “Nuk cënohet asnjë centimetër nga trualli që ka Teatri Kombëtar. Hapi tjetër është të pranohet që ai projekt që do bëhet, të bëhet më konkurs ndërkombëtar. Ai pranoi që të bëjë dëgjesë publike për këtë pikë, për konkursin ndërkombëtar”.
Në lidhje me projektin e Teatrit, Trebicka ka thënë se ai ka qenë provizor dhe do të negociohet sërish.
