Rreth orës pesë të pasdites kanë rënë në të njëjtën kohë rrjetet sociale më të përdorura në botë, ‘Facebook’, ‘Instagram’ dhe ‘WhatsApp’.
Të treja aplikacionet, në pronësi të ‘Facebook’, ndaluan së punuari njëkohësisht.
Lidhur me këtë ka reaguar edhe këngëtarja shqiptare, Dafina Zeqiri.
Ajo ka bërë një postim në llogarinë e saj në “Twitter” ku thotë se periudha e izolimit duket si bllokimi i këtyre rrjeteve sociale.
“Kështu duket karantina si Facebook, Instagram, WhatsApp”, ka shkruar ajo.
Ndërkohë, në një njoftim nga “WhatsApp” është deklaruar se po punohet për t’i kthyer gjërat në normalitet.
“Ne jemi të vetëdijshëm se disa njerëz po përjetojnë probleme me WhatsApp për momentin. Ne po punojmë për t’i kthyer gjërat në normalitet dhe do të dërgojmë një përditësim këtu sa më shpejt të jetë e mundur”, thuhet në një deklaratë.
Po ashtu nga “Facebook” kanë thënë se janë të vetëdijshëm për problemin dhe po punojnë për ta zgjidhur.
“Ne jemi të vetëdijshëm se disa njerëz kanë probleme me qasjen në aplikacionet dhe produktet tona. Ne po punojmë që gjërat të kthehen në normale sa më shpejt të jetë e mundur, dhe kërkojmë ndjesë për çdo shqetësim”, thuhet në deklaratën e shefit ekzekutiv të komunikimit në Facebook, Andy Stone.
Kujtojmë që në vitin 2019, “Facebook” pësoi ndërprerjen e saj më të madhe ndër vite.
Për këtë gjë u deklarua se ishte një problem i shkaktuar gjatë “operacioneve të mirëmbajtjes rutinë”, megjithatë kompania është treguar përgjithësisht mjaft e fshehtë për shkaqet e ndodhive të tilla.
