Ngjarja skandaloze ku infermieret dhunojnë një paciente të moshuar në një qendër mjekësore në qytetin e Pejës, ka tronditur mbarë opinionin publik.
Videoja prej pasditës së djeshme (2 nëntor) është bërë virale kudo në rrjet, duke nxitur reagime të ashpra. Të shumtë kanë qenë edhe personazhet e njohur që kanë reaguar. Ndër to së fundmi reperi Getoar Aliu ose i njohur nga të gjithë si Getinjo.
Ngjarja makabër e ka prekur Aliun, i cili krahas një fotoje ku duket me nënën e tij, i bën asaj një premtim shumë të ndjerë.
“Derisa të kem fuqi edhe të marr frymë, kam me të ruajtë më shumë se sytë e mi! S’ka njeri të gjallë që ngre dorë mbi ty. Secila nënë mërzitet sot me atë video! Ishalla e keni shëndetin. Nëna është drita e syve! Atë ditë që e lë mbas dore dije që je verbuar,”-shkruan Getinjo.
Ndërkohë, Kryetari i Komunës së Pejës, Gazmend Muhaxheri ka reaguar pas publikimit të videos në fjalë.
Muhaxheri ka potencuar se Komuna e Pejës nuk e menaxhon asnjë institucion, i cili ofron shërbime geriatrike.
“Ftoj publikisht inspektoriatin e shëndetësisë dhe organet e rendit që të trajtojnë këtë rast.”, ka shkruar Muhaxhiri.
Është shqiptuar masa e arrestit prej 48 orëve kundër dy të dyshuarave për sulm ndaj një të moshuarës në shtëpinë e të moshuarve “ORENDA” në Pejë.
Sipas njoftimit të Prokurorisë Themelore në Pejë aty dyshohen se kanë kryer veprën penale “Sulmi” dhe veprën penale “ndihma në kryerjen e veprës penale Sulmi”.
