2018-ta bëri më në fund diçka siç duhet dhe na riktheu aktoren tonë më të dashur të adoleshencës, Amanda Bynes. Rikthimi i saj sapo theu internetin, pasi Amanda hyn në qendër të vëmendjes edhe një herë, përmes revistës “Paper” ku duket e lumtur dhe e shëndetshme.
Pasi kaloi disa probleme të shëndetit mendor dhe abuzimin me lëndët narkotike, ajo u tërhoq nga aktrimi në vitin 2010 kur ishte 24 vjeçe, për t’iu rikthyer para 4 vitesh jetës normale. Ajo është regjistruar në shkollën e modës ku diplomohet vitin e ardhshëm, ndërsa tani Amanda tregon hapur çdo sfidë që ka kaluar.
Ndërsa shumica e fansave të saj e kujtojnë me gëzim për rolet në filmat “What a Girl Wants” dhe “She’s the Man”, Amanda shpjegon se gjërat në prapaskenë nuk ishin aspak ashtu siç dukeshin.
Ajo sqaron se roli i djalit në filmin ku luajti krah Channing Tatum e futi atë në depresion për 6 muaj, sepse nuk i pëlqente vetja si dukej.
“Kur doli filmi dhe e pashë u futa në një depresion të thellë për 4-6 muaj, sepse nuk më pëlqente mënyra sesi dukesha si djalë”, pranoi Bynes.
Ajo e përshkroi atë si një eksperiencë shumë të çuditshme dhe sikur nuk ishte e saja.
Amanda gjithashtu pranoi se abuzimi me lëndët narkotike deformonte perceptimin e saj për pothuajse çdo gjë. Ajo ishte e droguar kur pa filmin e saj të fundit “Easy A” dhe pranoi se në atë moment vendosi që ta linte aktrimin.
“Kisha tymosur marijuan kur e pashë dhe filloi të më jepte efekt. Nuk e di nëse ishte një mendim që lindi nga droga, por ndikoi në trurin tim në një mënyrë ndryshe sesa ndikon te njerëzit e tjerë. Ndryshoi perceptimin tim për gjërat”, sqaroi aktorja.
Kur hoqi dorë nga aktrimi, prindërit e saj u angazhuan që të linte drogat dhe prej 4 vitesh ajo nuk konsumon më.
Rikthimi i aktores duket se i ka entuziazmuar të gjithë ata që ndiqnin filmat e saj në adoleshencë, por edhe të famshmit.
Burimi: Cosmopolitan
