Dy ditë pas përleshjes në Prishtinë, ku mbeti i plagosur dy reperat shqiptarë, Noizy dhe Varrosi, vjen dhe reagimi i parë nga familja.
Babai i Noizyt, Bashkim Rajku, ka treguar se lajmin e sherrit e ka marrë vesh nga mediat dhe menjëherë është nisur për në Kosovë, ku dhe ka takuar të birin e plagosur në spital. Si një nga personat më të afërt me të, ai tregon se si e gjeti Rigelsin në Kosovë.
“Noizy është shëndoshë e mirë si kokrra e mollës. Është gjuajtur me një pistoletë kalibër shumë të vogël, dhe ka marrë një gërvishtje të lehtë në këmbë. Dhe nuk është aspak e vërtetë që është plagosur në kokë. Noizy të martën në mbrëmje ka performuar në Ferizaj me program të plotë. Madje salla ku është mbajtur koncerti ka qenë më plot se herët e tjera”, ka thënë ai për Summer Pages të Gazeta Shqiptare.
“Kur e pashë, ishte duke qeshur. ‘S’kam asgjë’, më tha, ishte fare i qetë. Dhe me të vërtetë nuk kishte asgjë; sapo mori mjekimin doli menjëherë nga spitali”, ka shtuar babai i këngëtarit të mirënjohur.
Sipas Bashkimit, reperët nga Kosova i kanë sulmuar ata nga Shqipëria sapo i kanë parë, me qëllim poshtërimin e tyre. Ai ka thënë se ata kanë përdorur armë, ndërsa Noizy së bashku me pjesëtarët e tjerë të OTR kanë qenë të paarmatosur.
Babai i Noizy-t përmend edhe policët e Kosovës, që sipas tij, kanë qenë të paaftë për të mbrojtur Noizyn, ndaj dhe atij i është dashur të vetëmbrohet.
Kujtojmë që nga përleshja në Prishtinë, Noizy dhe Varrosi mbetën të plagosur, ndërsa Cozman dhe një mik i tij u arrestuan.
