Të gjitha shkollat 9-vjeçare dhe ato të mesme nga 1 shkurti do të bëjnë 3 lëndë në 6 orë. Si pjesë e reformës në sistemin parauniversitar, brenda një dite mësimore do të zhvillohen vetëm 3 lëndë që do të zgjasin secila nga 90 minuta, nga 45 minuta që ishin deri me tani. Në këtë mënyrë mësuesit kanë më shumë kohë për të shpjeguar dhe pyetur, por dhe nxënësit mund t’i kryejnë detyrat në klasë.
Drejtoresha e gjimnazit “Petro Nini Luarasi”, Teuta Braçaj, e cila ishte pjesë e grupit të punës që hartoi skemën e të procesit mësimor, shpjegoi se në shtator mund të aplikohet në metodë tjetër mësimdhënie, ku lëndët nuk do të zgjasin përgjatë gjithë vitit shkollor, por vetëm 3 muaj.
“Lënda që sot bëhet dy orë në javë të bëhet 6 herë në javë dhe të mbarojë brenda një 3-mujori. Mbaron fizika tremujorin e parë, biologjia tremujorin e dytë dhe kimia tremujorin e tretë dhe i bie që të ketë më pak lëndë brenda tremujorëve. Në fund e plotëson të gjithë programin shkollor. Është mendësia e mësuesit ajo që do ndryshojë duke menduar jo çfarë njohurish jam duke dhënë, por sesi do ta organizojë këtë 90 minutësh.
Është lehtësim për nxënësit, kurse mësuesve i ka hapur punë pasi duhet të mendohet mirë, sepse disa mësues janë me metodën e vjetër ku duhet që vetëm ai të shpjegojë dhe nxënësi në shtëpi ta kuptojë mësimin dhe ta bëjë mësimin vetë”, u shpreh Braçaj.
Reforma “3 lëndë në ditë”, e cila hyn në fuqi më 1 shkurt, bën të mundur të lehtësohet pesha e çantave të nxënëseve, një shqetësim ky për të gjithë prindërit. Nisma vjen nga një grup prindërish, mësuesish dhe nxënësish dhe i është propozuar Ministrisë së Arsimit në platformën për bashkëqeverisjen me qytetarë.
