Mëngjesin e sotëm, bashkëshorti i ministres së Arsimit, Besa Shahini u vu në prangat e policisë së Kosovës.
Lajmin e bëri të ditur Partia Social Demokrate e Kosovës, sipas së cilës deputeti Dardan Molliqaj u arrestua për pjesëmarrjen e tij në protestën për lirimin e deputetit Albin Kurti në vitin 2015.
“Molliqaj është arrestuar nën arsyetimin për pjesëmarrje në protestën për lirimin e deputetit Albin Kurti, në vitin 2015. Arrestimi i deputetit në fjalë ka qenë në kundërshtim me liritë dhe të drejtat e njeriut dhe në shkelje të plotë të procedurave ligjore. Për këtë arsye, ajo protestë ka qenë e drejtë dhe e nevojshme”, thuhet në njoftimin e PSD-së në Facebook.
Mirëpo pak minuta pas lajmit të bujshëm, bëhet me dije se bashkëshorti i Besa Shahinit është liruar. Lajmi konfirmohet për “Klan Kosova”, nga zëdhënësja e PSD-së, Natyra Kuçi.
“Rasti ishte dërguar në Prokurori. Deputeti Molliqaj tashmë është liruar me procedurë të rregullt. Rasti do të vazhdojë”, u shpreh ajo.
