Këngëtarja kolumbiane, Shakira, raportohet së është akuzuar për evazion fiskal dhe mund të dënohet me burg. Autoritetet spanjolle të tatimit kanë kërkuar nga prokurorët, që të shikojnë çështjet financiare të 40-vjeçares gjatë katër viteve, në mes të vitit 2011 dhe 2014, pasi pretendojnë se ajo mund të ketë shmangur pagimin e taksave.
Sipas të përditshmes spanjolle, “La Vanguardia”, bëhet fjalë për vite në të cilat këngëtarja jetonte në Spanjë, ku sidoqoftë nuk kishte ende rezidencë zyrtare. Sipas inspektorëve të tatimeve edhe në atë periudhë, Shakira kishte qëndruar në Barcelonë për më shumë se 183 ditë në vit, e si pasojë kishte detyrimin të paguante taksa në vend.
Ata që punojnë me Shakira-n, kanë thënë që bëhet fjalë për një ndryshim kriteresh dhe vlerësimi e jo për mashtrim me taksat.
“Është përdorur një teknikë e ndryshme”, thonë avokatët.
Fitimet e yllit vijnë kryesisht nga koncerte të mbajtura jashtë vendit, por tatimet spanjolle pretendojnë se taksat për atë periudhë Shakira duhet t’ia paguante Madridit.
Sipas revistës “Forbes”, nga 2010 deri në 2015-n, Shakira ka fituar rreth 25 milionë euro në vit nga turet e saj jashtë vendit. Shumë fansa të këngëtares pretendojnë se bëhet fjalë për një hakmarrje të tatimeve spanjolle; bashkëshorti i Shakira-s, Pique, kishte mbështetur hapur kauzën e separatistëve katallanë, duke votuar në referendumin e shpallur të paligjshëm.
Akuzat mundet t’i kushtojnë shtrenjtë këngëtares kolumbiane, që rrezikon përveç një gjobë të madhe, edhe 2 vite burg.
