Ndërsa fansat e çiftit të Sussex-it po mbajnë frymën për lajmin e madh, princi Harry sapo dha shenjën e parë se bashkëshortja e tij Meghan Markle mund të lindë shumë shpejt.
Një ndër arsyet pse mediat besonin se lindja nuk është edhe aq afër, ishte axhenda e ngjeshur e vizitave zyrtare të princit Harry. Këtë javë madje, u njoftua edhe një tjetër udhëtim: ai drejt Hollandës, në datat 8 dhe 9 maj.
Lajmi është se Harry vendosi ta shkurtojë qëndrimin në Hollandë, ku tashmë do të jetë atje për një vizitë 1-ditore në Hagë. Atje, princi Harry do të nisë zyrtarisht numërimin mbrapsht për lojërat Invictus, një event me sporte të disiplinave të ndryshme, i themeluar prej vetë princit, që do të mbahet pas një viti.
Plani fillestar ishte që çifti do të vizitonte fillimisht Amsterdamin, por duket se një arsye e fortë i ka shtyrë ata të anulojnë udhëtimin në datën 8, për të ndjekur vetëm pritjen e datës 9 në Hagë.
Sipas burimeve nga familja mbretërore, arsyeja e këtij ndryshimi është se “pjestarët e familjes kanë një sërë angazhimesh gjatë kësaj jave”, siç thanë për “People”.
Duke qenë se pritja e ëmbël e dukeshës së Sussex-it është paralajmëruar të marrë fund në pranverë dhe duke qenë se pranvera erdhi e po ikën, duket e drejtë të thuash se “angazhimet e pjestarëve të familjes”, mund të jenë fare mirë sjellja në jetë e fëmijës së parë për çiftin.
Meghan dhe Harry kanë qenë në qendër të vëmendjes gjatë javëve të fundit, për shkak se shtatzënia është konfirmuar zyrtarisht që në tetor.
Nuk kanë munguar as bastet në lidhje me emrin e bebes, ndonëse gjinia nuk është konfirmuar zyrtarisht. (lexo këtu)
